Олунньу 25 күнүгэр А.А.Саввин аатынан Чурапчытааҕы история уонна этнография түмэлин дьиэтигэр «Дьиэ кэргэн ытык мала» серия бырайыак чэрчитинэн «Өбүгэм өтөхтөөх малыгар махтана…» диэн Саха Өрөспүүбүлүкэтин култууратын туйгуна, биһиги коллегабыт, коллекционер Варвара Ивановна Душкина тус коллекциятыттан уонна дьиэ кэргэнин ытык малларыттан ураты быыстапката арылынна.

Саха сиригэр доруобуйа күнүгэр аналлаах олунньу 26 күнүгэр Ыччат киинин дьиэтигэр Республиканскай «Муус устар» ыччат фестивалын чэрчитинэн «Я Россиянин» диэн ыччат саастаах оҕолорго квиз оонньууну уонна «Мои шаги к здоровью» диэн иһитиннэриини киин бибилэтиэкэ үлэһитэ Маркова В.Е. тэрийэн ыытта.

РСФСР үөрэҕириитин туйгуна, Саха Өрөспүүбүлүкэтин култууратын үтүөлээх үлэһитэ, Аҕа дойду сэриитин кыттыылааҕа  Г.Д.Ефимов – Аратаа төрөөбүтэ 105 сылынан нэдиэлэ устата С.А.Новгородов аатынан Чурапчытааҕа орто оскуола 5-11 кылаастарыгар «Мин дьону, дойдуну, олоҕу таптыыбын»  диэн литературнай уруоктар ыытылыннылар.

Саха норуодунай суруйааччыта, А.Е.Кулаковскай аатынан Саха Өрөспүүбүлүкэтин судаарыстыбыннай бириэмийэтин лаурета, публицист, Чурапчы улууһун уонна Одьулуун нэһилиэгин бочуоттаах олохтооҕо В.Н.Егоров – Тумарча 90 сааһынан С.А.Новгородов аатынан Чурапчы  орто оскуолатын 11 кылаастарын үөрэнээччилэригэр литературнай уруоктар салҕаннылар.

Киин бибилэтиэкэ ааҕар саалатын үлэһитэ А.П.Капрынова В.Н.Егоров – Тумарча 90 сааһыгар аналлаах «Айар тыл алгыстаах аартыгынан» диэн виртуальнай кинигэ быыстапкатын тэрийдэ.

Өксөкүлээх Өлөксөй удьуора, суруйааччы В.В.Яковлев кэргэнэ К.Т.Кулаковская-Яковлева кэлэн киин бибилэтиэкэҕэ ыалдьыттаата, Е.А.Борисов архыып-бибилэтиэкэтин үлэтин, фондатын кытта билистэ. Ону тэҥэ архыып бибилэтиэкэ исписэлииһэ У.Н.Атласова тэрийиитинэн В.С.Соловьев — Болот Боотур аатынан Хатылы орто оскуолатын үрдүкү кылаастарын кытары интэриэһинэй көрсүһүү ыытта уонна Хатылытааҕы Көһөрүллүү түмэлигэр сырытта.

Олунньу 28 күнүгэр киин бибилэтиэкэҕэ саҥа тэриллибит ыччат улуустааҕы парламенын бастакы уопсай түмсүүтэ буолла. Бастыҥ, актыыбнай ыччаттар мустаннар парламент үлэтин, сыалын-соругун билистилэр, санааларын үллэһиннилэр. Парламент бэрэссэдээтэлинэн У.И.Туласынов талылынна, актив чилиэннэринэн нэһилиэктэртэн эдэр салайааччылар, педагогтар, культуура үлэһиттэрэ, быраастар, үөрэнээччилэр лидердэрэ сүүмэрдэнэн киирдилэр. Улуус депутаттарын сэбиэтин бэрэссэдээтэлэ Я.П.Оконешников, Ил Түмэн депутата П.П.Пинигин кыттыыны ыллылар, бэйэлэрин эҕэрдэлэрин, сүбэлэрин ыччаттарга тиэртилэр. Ону тэҥэ улуустааҕы ыччат палаатата уонна Е.А.Борисов архыып-бибилэтиэкэтэ бииргэ үлэлэһэргэ сөбүлэҥ түһэристилэр.

Икки нэдиэлэ устата киин бибилэтиэкэҕэ үгүс киһи интэриэһин тардан үлэлээбит «Биилээх сэп-сэбиргэл» ураты быыстапката бу нэдиэлэнэн үлэтин түмүктээтэ. Быыстапканы элбэх киһи сэҥээрдэ. Салгыы улууспут нэһилиэктэринэн «Биилээх сэп-сэбиргэл» көһөрүллэ сылдьар быыстапката тэриллэрэ былааннанар.