Дьол. Үөрүү
- Аналгыттан арахпаккын, төлкөҕүттэн төлөрүйбэккин.
- Бэлэм дьол дьоҥҥо анамматах. Көрдөөн булбуттар дьоллоноллор.
- Дьахтар дьулуура айылгытыттан күүстээх, тэнийэр-ууһуур аналлаах.
- Дьоллоох киһи үөрүнньэҥ. Үөрүнньэҥ киһини көрөн атыттар эмиэ үөрэллэр.
- Дьол уонна сор батысыһа сылдьаллар. Муҥнанара сэдэх киһи дьоллоох.
- Ийэ буолар иэс кирбиилэммэтэх.
- Киһи уйулҕата – ыйдаҥарар таас.
- Күүрээн, хаһыынан-ыһыынан эрэ буолбакка, чуумпунан эмиэ көҕүлэнэр.
- Маҥнай көрөн ылыныы кэскили кэрэһилиир.
- Олоҕу көҕүлээн түстээри, толору дьол дьоҥҥо анамматах.
- Тус олоххо дьахтар иэйиитэ күүстээх.
- Уларыйар дьол дьону арыаллыыр.
- Уоскуйан ис туругу булунуу өһүөннээх өйү-санааны өһүлэр.
- Үтүө киһи өйдөбүлэ бэскигэ ууруллубат баай.
- Үтүө киһи өҥөнү умнубат.
- Үтүө киһи төрүөҕүттэн түөрт өттүттэн хайыҥнаах.
- Үтүө киһи дьылҕатын эрдэттэн түстүүр айылгылаах.
- Үтүө өйдөбүл куту-сүрү уһуннук угуттуур.
- Үтүөнү үтүөнэн сиэтиһиннэрээри харыстыыллар.
- Үтүө санаа киһини сынньатар, күүскэ күүс эбэр.
- Хомойордооҕор үөрүү кэлэрэ кэбэҕэс.
- Эйэҕэс киһи мичээрэ да ис киирбэх.