Документы и судьбы: Чурапчинские колхозники-пересленцы в Булунском районе 1942-1949гг. кинигэ сүрэхтэннэ

  • 10.10.2025
  • 109

Алтынньы 10 күнүгэр Е.А.Борисов аатынан киин бибилэтиэкэҕэ улуу кыайыы 80 сылыгар анаммыт күүс өттүнэн хоту көһөрүллүү кыттыылаахтарын үйэтитэр өссө да үөрэтиллэ, чинчийиллэ илик историческай чахчылары булан дьоҥҥо сэргэҕэ таһаарбыт «Документы и судьбы: Чурапчинские колхозники-пересленцы в Булунском районе 1942-1949гг.» диэн кинигэ сүрэхтэниитэ буолла.

Кинигэ Дьокуускай куоракка ИП В.Д.Макеев чааһынай кинигэтин кыһатыгар 2025 сыллаахха бэчээттэнэн таҕыста. Саҥа кинигэни хомуйан оҥордулар: Е.П.Скрябина, Кытаанах нэһилиэгин бочуоттаах олохтооҕо, СӨ мунципальнай сулууспатын туйгуна, Чурапчы улууһун бочуоттаах бэтэрээнэ, СӨ историктарын уонна кыраайы үөрэтээччилэрин сойууһун чилиэнэ, үлэ бэтэрээнэ, кини кыыһа Е.И. Скрябина, Кытаанах нэһилиэгэ тыа сирин түөлбэтин баһылыгын солбуйааччыта, сиэттэрэ Д. И.Скрябин, М.К.Аммосов аатынан ХИФУ историческай факультетын лаборана, СӨ историктарын уонна кыраайы үөрэтээччилэрин сойууһун чилиэнэ, И. И. Скрябин, ХИФУ магистрант усутудьуона, СӨ историктарын уонна кыраайы үөрэтээччилэрин сойууһун чилиэнэ.

Кинигэ тупсаҕай көстүүлээх, халыҥ тастаах, титульнай илииһигэр кинигэ аата, ханна тахсыбыта, издательствота, сыла суруллубут. Титульнай илиис нөҥүө өттүгэр элбэх даннайдар киирбиттэр. Аннотациятыгар 1942-49сс. Булун оройуонугар Чурапчы оройуонуттан күүс өттүнэн көһөрүллүбүт колхуозтаах дьон дьылҕата докуомуоннарга, архыыбынай матырыйаалларга олоҕуран суруллубутун уонна ааҕааччы киэҥ араҥатыгар ананарын ыйбыттар.

Бу үөрүүлээх түгэҥҥэ Чурапчы улууһун баһылыга С.А.Саргыдаев, Кытаанах нэһилиэгэ тыа сирин түөлбэтин баһылыга И.Т.Пономарев, Улуус култууратын управлениятыттан И.П.Каженкин, Кытаанахтан төрүттээх Чурапчыга олорор биир дойдулаахтарын аатыттан Т.Е.Матвеева уо.д.а. дириҥ ис хоһоонноох, историяны үөрэтэр, сырдатар кинигэ тахсыбытыттан астынан туран,бэйэлэрин санааларын үллэһиннилэр, истиҥ махтал тылларын тириэртилэр.

Кинигэ биһирэмин ыытта ааҕааччыны кытта үлэлиир отдел сэбиэдиссэйэ М.Н.Кузьмина.

Добавить комментарий