Е.А. Борисов аатынан улуустаа5ы киин библиотека5а Саха народнай учуутала, РСФСР үтүөлээх учуутала, Чурапчы улууһун бочуоттаах олохтооҕо Дмитрий Павлович Чечебутов «Ийэ буолан олоҕу салҕаары» кинигэтин сүрэхтэниитэ буолла.

Күүс өттүттэн хоту көһөрүллүүттэн эргиллэн кэлбит эдэркээн кыргыттар алаһа дьиэ тэринэн, ыал ийэтэ буолан, оҕону-урууну тэниппит Герой ийэлэр уонна сэттэттэн үөһээ элбэх оҕолоохтору ааттарын үйэтитэр кинигэ буолар. Дмитрий Павлович Чечебутов дьону үйэтитиигэ суруйбут бу сэттис кинигэтэ буолар.

Кинигэни хомуйан оҥорууга «Көһөрүллүү» мусуойун сэбиэдиссэйэ Марфа Владимировна Чичигинарова уонна Дмитрий Павлович кэргэнэ Анна Дмитриевна күүс-көмө буолбуттарын Дмитрий Павлович сырдатта уонна махтанна.

 Улуус дьаһалтатын аатыттан «Чурапчы улууһа» муниципальнай оройуон улуус баһылыгын социальнай боппуруостарга солбуйааччы Мария Филипповна Кронникова эҕэрдэ тылын тириэртэ.

Ону таһынан нэһилиэк баһылыктара, хоту көһөрүллүү кыттыылаахтарын аймахтара, оҕолоро,сиэннэрэ кэлэннэр истиҥ тылларын тириэрдэн, махтанан эҕэрдэ суруктарын, сибэкки дьөрбөтүн, өйдөбүнньүк бэлэхтэрин биэрдилэр.

Чурапчы улууһун үөрэҕэриитин начаальныга Юрий Павлович Посельскай, Хатылы орто оскуолатын директора Екатерина Ивановна Егорова

Дмитрий Павлович үөрэҕэрии эйгэтигэр ыччаты, оҕону иитиигэ элбэх кылааты, үлэни оҥорбутун бэлиэтээн эттилэр. Хоту көһөрүллүү мусуойа -бу элбэҕи билиһиннэрэр, көрдөрөр, көһөрүллүү  ыар тыынын дьоҥҥо-сэргэҕэ, кэлэр кэнчээригэ кэпсиир-ипсиир сирэ буоларын, дьону үйэтитиигэ Дмитрий Павлович сүдү үлэни ыыппыта, ыыта да турарыттан хайҕабыл тылларын эттилэр. 

Ону таһынан ыалдьыттарга  анаан «ҮӨРҮҮ» оҕо дьоҕурун сайыннарар киин сылын аайы ыытыллар Көһөрүллүү диэн уруһуй куонкурсун кыттыылаахтарын үлэлэрэ быыстапкаҕа туруорда.

Бу тиэмэ кэлин өссө киэҥник чинчийиллэн, үөрэтиллэн суруллуоҕа диэн Дмитрий Павлович баҕа санаата туола турдун, Дмитрий Павловичка, Марфа Владимировнаҕа айар-суруйар, кыраайы үөрэтэр түбүктээх үлэлэригэр ситиһиилэри, чэгиэн-чэбдик туругу баҕарабыт.