Россияҕа Дьиэ кэргэн, Саха  сиригэр Оҕо саас сылларын  чэрчитинэн СӨ Национальнай библиотеката тэрийбит  «Дьиэ кэргэн бастыҥ кинигэтэ»  өрөспүүбүлүкэтээҕи улахан күрэҕин   кыайыылаахтара ааттаннылар. Күрэх  дьиэ кэргэн  үгэс буолбут   сыаннастарын өйөөһүҥҥэ,  харыстааһыҥҥа уонна үйэтитиигэ, ону тэҥэ кинигэ культуратын, бэчээт үлэтин  сырдатыыга, тарҕатыыга туһуланан  от ыйын 1 күнүттэн сэтинньи 15 күнүгэр дылы ыытыллыбыта. Чурапчы улууһуттан бу күрэххэ СӨ доруобуйатын харыстабылын үтүөлээх  үлэһитэ, РФ, СӨ  доруобуйатын харыстабылын туйгуна, «Гражданскай килбиэн » бэлиэ хаһаайына, Чурапчы улууһун П.Н. Сокольников аатынан киин балыыһа клинико- диагностическай лабораториятын сэбиэдиссэйэ, кыраайы үөрэтээччи Любовь Михайловна Григорьева  «Дьиэ кэргэн летопиһа»   номинацияҕа   «Мөккүөрдээх кэм туоһулара»   кинигэтинэн кытынна. Ахсынньы 17 күнүгэр Национальнай библиотекаҕа күрэх түмүгүн биллэрии үөрүүлээх чааһыгар кинигэ  ааптардара Григорьева Любовь Михайловна уонна Андросова Татьяна Игнатьевна  “Добун сурук”  II   үрдэлинэн наҕараадаланнылар. Кинигэ  репрессия ыар сылларыгар  хаан- уруу аймахтара, үс ини — бии Михаил, Василий, Никифор  Слепцовтар ыар дьылҕаларын, эндирдээх олохторун  арыйар. Любовь Михайловнаны, Татьяна Игнатьевнаны үрдүк сыанабылынан   итиитик-истиҥник эҕэрдэлиибит, айар үлэҕитигэр өссө үрдүк ситиһиилэри баҕарабыт!