Оҕо библиотекатыгар “Сила книги” акция ыытылынна.

   Быйыл Россияҕа “Наука уонна технология” сыла биллэриллэн турар. Ыам ыйын 27 күнүгэр бүттүүн Россия үрдүнэн библиотека күнүн бэлиэтиибит. Бу күнү көрсө үһүс сылын “Сила книги” диэн республиканскай акция ыытыллар. Бу күн нэһилиэк, куорат биллэр дьоно оҕолорго сөбүлээн аахпыт айымьыларыттан быһа тардан ааҕан иһитиннэрэллэр. Быйылгы акциябытыгар наука эйгэтин дьоно, эбэтэр изобретателлэр кыттыыны ылаллар. Онон Оҕо библиотекатыгар ыалдьыттыы кэллэ Чурапчы нэһилиэгин олохтооҕо, изобретатель, новатор Иннокентий Николаевич Новгородов оҕолору кытта Зуум платформа нөҥүө көрсөн кэпсэттэ. Иннокентий Николаевич оҕо сылдьыаҕыттан фантастика жанрын сөбүлээн ааҕарын, Оҕо библиотекатыгар баар фантастика кинигэлэрин барытын ааҕан бүтэрбитин туһунан оҕолорго сэһэргээтэ. Уонна Оҕо сылдьан сэҥээрэн аахпыт Кир Булычев “Девочка с земли” айымньыттан быһа тардан ааҕан иһитиннэрбитин оҕолор сэргээн иһиттиллэр. Салгыы Иннокентий Николаевич бэйэтэ оҥорбут техникаларын туһунан оҕолорго кэпсээн улахан интэриэһи тарта. Үөрэнээччилэр интэриэһинэй ыйытыктарынан көмтүлэр. С.К.Макаров аатынан Чурапчытааҕы гимназия 5а кылааһын үөрэнээччитэ Собакин Коля салайаааччытын кытта оҥорбут тепловизорын туһунан кэпсээтэ. Иннокентий Николаевич Коляҕа сүбэлэри биэрдэ. Сүрдээх истиҥ, иһирэх, интэриэһинэй кэпсэтии, көрсүһүү таҕыста. Иннокентий Николаевичка уонна Инга Васильевнаҕа Оҕо библиотекатын аатыттан махталбытын тириэрдэбит.

 Оҕо библиотекатын коллектива.