Ыам ыйын 19 күнүгэр Чурапчы улууһун киин библиотекатын ааҕааччыны кытта үлэлиир салаата ЗУУМ площадка нөҥүө Саха литературатыгар  дьахталларга поэзия эйгэтигэр суолу тэлбит поэт Варвара Потапова 75 сылын бэлиэтээн «Кини олоҕу таптыыра» диэн төгүрүк остуол нөҥүө литературнай көрсүһүүнү тэрийэн ыытта.

     Көрсүһүүгэ В. Потапованы кытта биир кэмҥэ үөрэммит, кинини поэт быһыытынан билэр поэт, кириитик, краевед, СӨ культуратын үтүөлээх үлэһитэ, П.А. Ойуунускай аатынан судаарыстыбаннай бириэмийэ лауреата Н.Е.Винокуров -Урсун ыалдьыттаата. Биир дойдулаахтара Ньурба улууһун киин , Сүлэ уонна Убайаан библиотекаларыттан үлэһиттэр истиҥник ахтан кэпсээтилэр. Поэт олоҕун, айымньытын сырдатар саҥа кинигэ тахсарын үтүө солуну иһитиннэрдилэр, үйэтэтиигэ түмэл, «Ньурба күһүнэ» ааҕыылар тустарынан киэҥник сырдаттылар. Саха тылын үөрэтэр учуутал Кузьмина Акулина Николаевна оскуолаҕа В.Потапова айымньыларын үөрэтии туһунан кэпсээтэ.

     Төгүрүк остуол кыттыылаахтара бары биир санаанан В.Потапова хоһооннорун хомуурунньуга хос бэчээттэнэн тахсара буоллар диэн баҕа санааҕа кэллилэр.

     Көрсүһүүнү сэнээрэн киирэн кыттыбыттарга барҕа махталбытын  тиэрдэбит.

                                                 Үчүгэйиэн бу сиргэ

                                                Үөрэ-көтө сылдьар 

                                                Үгүс дьоннуун сэргэ

                                                Олох дьолун сырсар.

В.Потапова хоһоонугар эппит тылларын курдук олоруоҕун, үлэлиэҕин, чөл буолуоҕуҥ.