«Улахан этнографическай дьыктаан» Vlll-с төгүлүн ыытыллар улахан акция тэрийээччитэ национальностар дьыалаларын федеральнай агенствота, Саха сиринээҕи сүрүннээччи СӨ тас сыһыаннар уонна норуоттар дьыалаларын министиэристибэтэ.

Дьыктааҥҥа сааһыттан, омугуттан, олорор сириттэн тутулуга суох ким баҕалаах оффлайн уонна онлайн форматынан кыттар. 2022 с. этнографическай дьыктааҥҥа 183 дойдуттан, 89 субъектан 4 мөл. тахса киһи кыттыбыт.

Быйылгы дьыктаан Арассыыйа норуоттарын Сомоҕолоһууларын күнүн  көрсө сэтинньи 3 күнүттэн 8 күнүгэр диэри ыытыллар. Дьыктаан сыала — соруга Арассыыйаҕа олорор норуоттар историяларын, култуураларын, үгэстэрин билиигэ көҕүлээһин, интириэһи тардыы, нэһилиэнньэ уопсай билиитин үрдэтии уонна сыаналааһын буолар.

Бүгүн улуустааҕы киин библиотека тэрийбит былаһааккатыгар СӨ тутууга уонна олох-дьаһах хаһаайыстыбатын миниистирэ Романов В. Д., Чурапчы улууһун баһылыга Саргыдаев С. А., Чурапчы нэһилиэгин баһылыга Сивцев В.Д. уонна улуус салалтатын үлэһиттэрэ, тэрилтэ салайааччылара  этнографическай дьыктааны суруйдулар. Аахсыйа кыттыылаахтара 45 мүнүүтэ иһигэр 30 ыйытыыга эппиэттээн бэйэлэрин тургутан көрдүлэр.

Кыттааччылар ыйытыктар уустуктарын, интириэһинэйдэрин, киһи бу дьыктаантан элбэҕи, саҥаны билэрин бэлиэтээтилэр.  Дьыктаан бары  кыттыылаахтарыгар  тэрийээччи махтал суруктара уонна кыттыы иһин туоһу суруктар туттарылыннылар.