«Чурапчы пионерскай тэрилтэтин историята 1925-2025» саҥа кинигэ сүрэхтэниитэ буолла.
Ахсынньы 10 күнүгэр Е.А.Борисов аатынан киин бибилэтиэкэҕэ «Чурапчы пионерскай тэрилтэтин историята 1925-2025» саҥа кинигэ сүрэхтэниитэ буолла.
Кинигэ Чурапчытааҕы «Саҥа олох» эрэдээксийэтигэр таҥыллан, «Дани-Алмас» кинигэ кыһатыгар 100 экземплярынан бэчээттэнэн тахсыбыт. Кинигэҕэ Чурапчы улууһун оскуолаларын пионерскай тэрилтэлэрин, райкомол, пионер дьиэтин, герой-пионер Сима Сергеев туһунан кэпсэнэр матырыйааллар, пионербаһаатайдар, оччотооҕу пионердар ахтыылара, бэчээккэ тахсыбыт ыстатыйалар киирбиттэр. Ааҕааччы киэҥ араҥатыгар ананар диэн суруллубут.
Бу тэрээһиҥҥэ араас сылларга үлэлээбит пионербаһаатайдар, пионерскай үлэ бэтэрээннэрэ, билигин оҕо иитиитин уонна үөрэх эйгэтигэр үлэлии сылдьар педагогтар, улуус дьаһалтатыттан, үөрэх управлениятыттан, оскуола үөрэнээччилэрэ кыттыыны ыллылар. Саҥа кинигэни билиһиннэрдэ Борисов киин сэбиэдиссэйэ В.А.Платонова.
