Муус устар 25 күнүгэр Е.А.Борисов аатынан Чурапчытааҕы киин библиотекаҕа бүтүн Россиятааҕы “Библионочь” 14 төгүлүн бэрт сэргэхтик, тэрээһиннээхтик ыытыллынна. Ол курдук, акция чэрчитинэн араас маастар-кылаастар, быыстапкалар, күрэхтэр ыытыллыннылар, дьон-сэргэ биһирэбилин ыллылар. “Библионочь” акция үөрүүлээх арыллыытыгар “Чурапчы нэһилиэгэ” тыа сирин түөлбэтэ баһылыгын социальнай боппуруостарга солбуйааччы В.В.Макарова, улуустааҕы библиотека салайааччыта А.М.Смирникова, советскай-партийнай үлэ бэтэрээнэ С.И.Никитин эҕэрдэ тыл эттилэр. Тэрээһин дьоһун көстүүтүнэн “Кыайыы чемодана” быыстапка буолан ааста. Манна А.А.Саввин аатынан история уонна этнография уонна “Албан аат” түмэллэрин үлэһиттэрэ, сэрии кыттыылаахтара П.Т.Карсанаев уонна П.Е.Спиридонов оҕолоро сэдэх экспонаттары көрдөрдүлэр. А.П.Гоголев аатынан Чурапчытааҕы оҕо искусствотын уруһуй кылааһын уонна декоративно-прикладной кылаастарын иитиллээччилэрин быыстапката элбэх сэҥээриини ылла. Салҕыы акция кыттыылаахтара бэйэлэрин интириэстэринэн арахсан маастар-кылаастарга сырыттылар: ол курдук байыаннай дьайыы кыттыылаахтарыгар анаан «Ымыы» харысхал, кыайыы лиэнтэтэ — брошь оҥордулар. Олус интэриэһинэй компьютернай графика уонна аудиомонтаж маастар кылааһыгар сылдьан үгүһү биллилэр. «Кыайыыга кынаттыыр ырыалар» байаан доҕуһуолунан сэрии кэминээҕи ырыалары ахтан-санаан дуоһуйа ыллаатылар. Улуу сэрии историятыгар анаммыт биэс түһүмэхтээх өй оонньуутугар кытыннылар. Тэрээһин кыттыылаахтара салҕыы «Улуу кыайыыны уруйдуубун» диэн хоһоон күрэҕэр саха суруйааччыларын хоһооннорун аахтылар. Бу киэһээ кэлбит ыалдьыттар минньигэс чэй арааһын боруобалаатылар, оонньоон, элбэҕи билэн, дуоһуйа сынньанан тарҕастылар. “Библионочь” акция улууспутугар сыл ахсын кэҥээн, сэҥээрээччилэрэ элбээн иһэр.