“Боотуруускай улууһа I Хатылы нэһилиэгэ”диэн сабыс-саҥа кинигэ иккис чааһын сүрэхтэниитэ балаҕан ыйын 6 күнүгэр Егор Борисов аатынан Чурапчытааҕы киин бибилэтиэкэҕэ буолла.

Дьоҥҥо-сэргэҕэ, ыалдьыттарга ини-бии Скрябиннар, Дмитрий уонна Иннокентий өр сылларга муспут коллекцияларын: араас моһуоннаах уруучукалары, араас быһыылаах омуктар хаартыларын, манньыат харчыларын,  улахан суруйааччылартан, учуонайдартан автографтаах көрдөрүүгэ турдулар.

Тэрээһин саҕаланыытыгар  Чурапчы улууһун дьаһалтатыттан Киин территориальнай быыбардыыр хамыыһыйа бэрэссэдээтэлэ  Дария Никитина

махтал суруктары, наҕараадалары кинигэ ааптардарыгар туттарда.

Одьулуун нэһилиэгиттэн “Одьулуун нэһилиэгэ” МТ баһылыга  Людмила Ефремова, уонна Одьулуун музейын үлэһитэ Евдокия Окорокова.

Василий Яковлев-Далан аатынан Кытаанах орто оскуолатын дириэктэрэ  Иван Коркин,

Чурапчы улууһун дьаһалтатын ыччакка отделын исписэлииһэ  Алгыстаана  Федорова,

кыраайы үөрэтээччи, киин балыыһа лабораториятын отделениетын сэбиэдиссэйэ  Любовь Григорьева,

«Олоҥхо киинин» дириэктэрэ  Дмитрий Попов,

Андрей Саввин аатынан Чурапчы кыраайы үөрэтэр уонна этнография мусуойун методиһа  Юрий Толстоухов,

Килэҥкиттэн төрүттээхтэр дьаһалта бэтэрээннэрэ,

“Чурапчы” литэрэтииринэй түмсүү чилиэттэрэ, Скрябиннар аймах-билэ дьонноро, чугас доҕотторо эҕэрдэ тыллары эттилэр. Кинигэ сүрэхтэниитин киин бибилэтиэкэ ааҕааччыны кытта үлэлиир отдел сэбиэдиссэйэ Марфа Николаевна Кузьмина  баһылаан-көһүлээн ыытта.

Ыалдьыттарга баай фуршет остуол тардыллан, ырыа-тойук аргыстаах музыкальнай нүөмэрдэр ыллананнар дьон-сэргэ сэҥээриитин ылла, сүргэтин көтөхтө.

Кинигэ ааптардарын түбүктээх үлэлэрэ түмүктэммитинэн итиитик-истиҥник эҕэрдэлиибит. Айар-тутар үлэҕит сытыы бөрүөтэ сыппаабатын, үтүө сүбэҕитинэн, билиигитин-көрүүгүтүн өрүү дьоҥҥо-сэргэҕэ тириэрдэ, саҥаттан-саҥа үрдэллэри дабайа тураргытыгар баҕарабыт.