«Бойобуой доҕордоһуу чаҕылхай туоһулара» кинигэ сүрэхтэниитэ
Кулун тутар 20 күнүгэр Е.А.Борисов аатынан киин бибилэтиэкэҕэ Эдуард Еремеев суруйбут «Бойобуой доҕордоһуу чаҕылхай туоһулара» кинигэ сүрэхтэниитэ буолла. Кинигэ 2025 сыллаахха Дьокуускай куоракка «Дани-Алмас” кыһатыгар 1000 экземплярынан 128 страницалаах кээмэйинэн бэчээттэнэн тахсыбыт. Кинигэ ааптара Эдуард Данилович Дьоруой Дмитрий Егоров биир дойдулааҕа, Сунтаар улууһун Уһун Күөл олохтооҕо. Кинигэ сүрэхтэниитин киин бибилэтиэкэ ааҕааччыны кытта үлэлиир салаа сэбиэдиссэйэ Е.Н.Дьячковская ыытта.
Кинигэ Арассыыйа уонна ДНР Дьоруойа Дмитрий Егоров- Сунтаар уонна кини бойобуой доҕоро “Эр санаа” уордьан кавалера Николай Романов- Ронин анал байыаннай дьайыыга барыахтарыттан тиһэх күннэригэр диэри бииргэ сылдьыбыт дьон кэпсээниттэн уонна эйэлээх олоххо үлэлэрин, чугас дьоннорун туһунан ахтыылартан таҥыллан документальнай сэһэн быһыытынан суруллубут. Дмитрий Егоров уонна кини бойобуой доҕорун Николай Романов тустарынан, итиэннэ анал байыаннай дьайыы дьоруойдарын кэпсиир кинигэ быыстапката, ону тэҥэ Николай Романов тутта сылдьыбыт маллара, докумуоннара, суруммут блокноттара, анал байыаннай дьайыыга кэтэ сылдьыбыт таҥаһа турдулар.
Тэрээһин саҕаланыытыгар кинигэ ааптара Эдуард Еремеев видео сибээһинэн кинигэ хайдах суруллан тахсыбытын билиһиннэрдэ, санаатын үллэһиннэ.
Көрсүһүүгэ Дьоруой Дмитрий Егоров бииргэ төрөөбүт убайа Республиканскай оперативнай штаб координационнай киин республиканскай комиссиятын “Вместе к Победе!” киинин үлэһитэ Алексей Николаевич Егоров, Николай Романов кэргэнэ Ньургуйаана Герасимовна Романова, бииргэ төрөөбүт эдьиийэ Лиана Николаевна Попова кыттыыны ыллылар. Кинилэр кинигэ геройдарын, доҕордуу уолаттар тустарынан истиҥник санаан-ахтан, оҕо, оскуола, эдэр саастарын, бойобуой сырыыларын дьоҥҥо-сэргэҕэ билиһиннэрдилэр. Видео сибээһинэн Дмитрий Егоров аҕата Николай Алексеевич уолун тиһэх бойобуой, хорсун сырыытын кэлбит дьоҥҥо кэпсээн иһитиннэрдэ. Бойобуой дьайыыга бииргэ сылдьыспыт доҕордоро Амма улууһуттан сылдьар Роман Филатов- Фил холбонон доҕотторун тустарынан хайдах билсибиттэрин, бойобуой доҕордоһууларын туһунан сырдатта. Николай Николаевич бииргэ алтыспыт чугас дьоно, кэллиэгэлэрэ, табаарыстара, учуутала ахтыы оҥордулар, санааларын үллэһиннилэр. Чурапчы улууһун баһылыгын социальнай боппуруостарга солбуйааччы М.Ф.Кронникова, Чурапчы улууһун баһылыгын солбуйааччы А.Г.Лобанов, Чурапчы тыа сирин түөлбэтин баһылыгын социальнай боппуруостарга солбуйааччы В.В.Макарова, Чурапчы улууһа бойобуой дьайыы бэтэрээннэрин түмсүүтүн салайааччыта С.А.Жендринскэй, Чурапчы нэһилиэгин «Аҕа түмсүүтүн» бэрэссэдээтэлэ Д.Р.Слепцов, биир дойдулааҕа улуус сэбиэтин депутата С.И. Собакин, кииннэммит библиотечнай ситим дириэктэрэ А.М. Смирникова Ийэ дойдуларын туһугар олохторун толук уурбут хорсун буойуттар Дмитрий Егоров уонна Николай Романов тустарынан кинигэ ыччаты патриотическай тыыҥҥа, ийэ дойдуга бэриниилээх буолууга, эрэллээх доҕордуу сыһыаҥҥа иитэр дириҥ суолталааҕын бэлиэтээтилэр, кинигэ ааптарыгар, кыттыыны ылбыт чугас дьонноругар махталларын тиэртилэр.
