«Билии байҕала угуйар аартыгынан»
СӨ култууратын үтүөлээх үлэһитэ, СӨ култууратын туйгуна, «СӨ бибилэтиэкэ дьыалатын сайдыытыгар кылаатын иһин» бэлиэ хаһаайына, өр сыллар усталарыгар Чурапчытааҕы кииннэммит бибилэтиэкэ ситимин салайбыт Вера Аполлоновна Платонова үбүлүөйдээх сааһын бэлиэтиир «Билии байҕала угуйар аартыгынан» истиҥ көрсүһүүтэ буолла. Талааннаах салайааччы Вера Аполлоновна бибилэтиэкэ эйгэтигэр 38 сыл, ол иһигэр 28 сыл дириэктэринэн үлэлээн Чурапчы улууһугар бибилэтиэкэ дьыалата сайдыытыгар үтүө суобастаах, бэриниилээх үлэтинэн сүҥкэн кылааты киллэрсэр дьоһун дьоннортон биирдэстэрэ буолар. Үлэлээбит сылларыгар улуус бибилэтиэкэлэрэ олох сайдыытын кытта тэҥҥэ хардыылыылларыгар, материальнай баазалара тупсарыгар, пуондалара хаҥыырыгар, идэлээх кадрдары бэлэмнээһиҥҥэ үгүс үтүмэн үлэни ыыппыта. Вера Аполлоновна — сатабыллаах салайааччы эрэ буолбатах кини дьону түмэр, мындыр сүбэһит, өрүү үтүөнү дьоҥҥо баҕарар амарах сүрэхтээх, улахан дьиэ кэргэн Далбар Хотуна, истиҥ ийэ, эйэҕэс эбээ. Вера Аполлоновна өрөспүүбүлүкэ уонна улуус бэлиэ тэрээһиннэрин, кинигэ сүрэхтэниилэрин иилээн саҕалаан ыытар бастыҥ ыытааччы. Бу күн кэлбит ыалдьыттар Вера Аполлоновна киэҥ эйгэҕэ билиһиннэрбит кинигэлэрин быыстапкатын билистилэр.
Бу дьоро күнүнэн Вера Аполлоновнаны Улуустааҕы депутаттар Сэбиэттэрин бэрэссэдээтэлэ Оконешников Я.П, Чурапчы нэһилиэгин тыа сирин түөлбэтин баһылыга Сивцев В.Д, Хатылы нэһилиэгин баһылыга Попов В.Е., Одьулуун нэһилиэгин баһылыга Ефремова Л.В., улуустааҕы М.Н.Саввина салайар «Салайааччы Дьахталлар» түмсүүлэрэ, култуура управлениятын салайааччытын солбуйааччы Дьячковская С.Д., А.А.Саввин аатынан Чурапчытааҕы түмэл дириэктэрэ А.А.Захаров, Чурапчытааҕы уонна Дириҥнээҕи оҕо ускуустубатын оскуолаларын дириэктэрдэрэ Сивцева А.И., Новгородов А.П., Чурапчытааҕы кииннэммит библиотечнай ситим дириэктэрэ Смирникова А.М., Олоҥхо киинин салайааччыта Попов Д.Д., араас эйгэлэртэн өр сылларга бииргэ алтыһан үлэлээбит дьоно-сэргэтэ, бииргэ үлэлиир коллегалара, библиотека бэтэрээннэрэ бэйэлэрин истиҥ эҕэрдэлэрин, өр сыллаах үлэтин үрдүктүк сыаналаан үтүө баҕа санааларын тиэртилэр. Вера Аполлоновнаны кытта биир кэмҥэ уһуннук үлэлээбит өрөспүүбүлүкэ араас улуустарын бибилэтиэкэлэрин салайааччылара уонна Национальнай бибилэтиэкэ научнай-методическай киинин исписэлииһэ Евдокимова С.Н. бэлиэ күнүнэн куйаар ситиминэн эҕэрдэлээтилэр. Чурапчыга олорор, айар суруйааччылар Р.И.Корякина- Хотууна, П,П.Федоров- Сомоҕо Вера Аполлоновна литература сайдыытыгар сүҥкэн кылаатын бэлиэтээн туран махталларын, эҕэрдэлэрин тиэртилэр. Бу киэһэни бибилэтиэкэ эдэр үлэһиттэрэ ылбаҕай ырыанан киэргэттилэр. Түмүккэ Вера Аполлоновна бу истиҥ биэчэри тэрийбит кэлэктиибигэр, кыттыбыт ыалдьыттарга дириҥ махталын уонна кэлэн иһэр сандал саас маҥнайгы бырааһынньыгынан эҕэрдэтин тиэртэ.
