Библиотека сонуннара
Балаҕан ыйын 16-19 күннэригэр Дьокуускай куоракка СӨ Национальнай библиотека тэриллибитэ 100 сылыгар анаммыт IV норуоттар икки ардыларынааҕы библиографическай конгресс «Библиография в сохранении культурного наследия и языкового многообразия народов мира» ыытылынна. Чурапчы улууһун библиотекардара бу улахан конгресска кыттыыны ыллылар. Сиһилии: https://churlib.ru/iv-noruottar-ikki-ardylarynaa5y-bibliograficheskaj-kongress/
Аҕа дойду сэриитин кэмигэр Чурапчы колхуостарын күүс өттүнэн Хоту көһөрүллүүлэрин 83 сылыгар анаммыт тэрээһиннэр ыытылыннылар. Е.А.Борисов аатынан киин библиотекаҕа көһөрүллүү кэмин кэрэһэлиир коллекционердар харайан илдьэ сылдьар малларын-салларын быыстапката туруоруллан көрбүт, сылдьыбыт ыалдьыттар улахан интириэстэрин тарта, ордук оскуола үөрэнээччилэригэр эбии билиини-көрүүнү биэрдэ.
Бу анал нэдиэлэ чэрчитинэн оскуола үөрэнээччилэригэр көһөрүллүү историятын үөрэтэр, сырдатар библиотечнай уруоктар, экскурсиялар, онлайн-викторина ыытылла тураллар.
Кэриэстэбил күнүгэр СӨ культуратын туйгуна В.М.Лаврентьев устан хаалларбыт, муспут сэдэх видеоматериалларын көрдөрүү киин библиотекаҕа буолла. Тэрээһиҥҥэ көһөрүллүү кыттыылаахтара, оҕолоро, бары нэһилиэктэртэн кэлэн кыттыыны ыллылар. Владимир Михайлович Лаврентьев араас сылларга бэйэтэ уһулбут видеоархыыбын төрөппүт кыыһа, анал байыаннай дьайыы кыттыылааҕын ийэтэ, өрөспүүбүлүкэҕэ улахан волонтерскай хамсааһын салайааччыта Светлана Владимировна Диодорова-Лаврентьева музейдарга, архыыпка туттаран улуус историятын кэрэһэлиир дьоһун бэлэх оҥордо.
Егор Борисов аатынан киин бибилэтиэкэҕэ киэн туттар биир дойдулаахпыт, саха норуодунай суруйааччыта, Чурапчы уонна Булуҥ улуустарын Бочуоттаах гражданина С.А. Попов-Сэмэн Тумат “Муус модьоҕону тыыннаабыт Саҕастыырым” саҥа кинигэтэ сүрэхтэннэ. Бу кинигэ Дьокуускайга «Алта» кинигэ кыһатыгар 2024 с. Булуҥ улууһа МТ (баһылык А.А.Андросов) үбүлээһининэн бэчээттэнэн тахсыбыта. Саха норуодунай суруйааччыта Сэмэн Тумат төрөөбүт-үөскээбит Саҕастыырын, чэпчэкитэ суох ааспыт оҕо сааһын, төрүт удьуор дьонун туһунан, кинилэр туох кыһалҕаны көрсүбүттэрин, оччотооҕу олох кытыан кыһалҕатын өйдөөн-санаан, анааран, общественнай өрүттэригэр тирэҕирэн бу кинигэни суруйбут. Кинигэ сүрэхтэниитигэр улуус дьаһалтатыттан, көһөрүү кыттыылаахтара, үөрэх, культура үлэһиттэрэ, общественность кыттыыны ыллылар. Суруйааччы биир дойдулаахтарыгар айар үлэтин өйүүллэригэр, биһирииллэригэр махталын биллэрдэ.
