Бүгүн, бэс ыйын 4 күнүгэр Е.А.Борисов аатынан киин бибилэтиэкэҕэ киэн туттар биир дойдулаахпыт, саха норуодунай суруйааччыта, П.А.Ойуунускай аатынан  Судаарыстыбаннай  бириэмийэ лауреата, Саха Өрөспүүбүлүкэтин Духуобунас академиятын академига, Доҕордоһуу уордьан кавалера Василий Семенович Яковлев — Далан төрөппүт кыргыттара Ольга Васильевна Анисимова уонна Лолита Васильевна Яковлева, ону кытта суруйааччы аймахтара ыалдьыттаатылар. Күндү ыалдьыттарбыт бибилэтиэкэҕэ экскурсиялаатылар, Е.А.Борисов архыып-бибилэтиэкэтин билистилэр. Баай ис хоһоонноох фондалааҕын, бибилэтиэкэ дьиэтэ тупсаҕайын астына бэлиэтээтилэр. Чурапчы бибилэтиэкэтин электроннай ресурсаларынан интэриэһиргииллэрин, ону туһаналларын иһитиннэрэн, махталларын тиэртилэр. Инникитин да айымньылаах үлэни, ситиһиилэри баҕардылар. Ыалдьыттарбытыгар, махталы кытта, өйдөбүнньүк кинигэлэри бэлэхтээтибит.