Баай. Сокуон
- Ааһар ыалдьыкка сандалыттан босхо эт тиксэр.
- Арыгы буруйу оҥоруу төрүөтэ буолбатах. Илээт киһи кутугар-сүрүгэр эрдэттэн иҥэринэ сылдьар бэлэм төрүөтүн күөртээччи эрэ.
- Баайдар маллара үс күлүүстээх, бүддьүөт аана аһаҕас.
- Баартан илии тутуурданар, өттүк хараланар, суоҕу суох арыаллыыр.
- Байар баҕа кычыгылатар абылаҥнаах.
- Байар баҕа өй-санаа дьүүлүн-дьаһалын симэлитэр.
- Бурдуктаах ампаар сыта хонуу кутуйахтары ыраахтан угуйар.
- Буруйу оҥоруу – дьайыы, амнистия кумааҕы буолара умнуллубат.
- Быйаҥнаах далбарга эрдэттэн ананан киһи аймах айыллыбат.
- Быйаҥ ытыстан эмиллибэт, босхо тиксибэт.
- Бэрик, табаны тардыбат бөрө буолбатах, суолун хаалларбат.
- Дьыалаҕа иҥнибит юрист сатаан көмүскэммэт.
- Икки атах үллэстибэтэҕэ үгүс. Үлүмнэһимэ.
- Кирдээххэ ким сысытыбат, ырааска биһиллэр.
- Куобах оннугар бүддьүөт үбэ тоһуурга бултанар.
- Манаммат бүддьүөт үбэ былдьаһыктаах бырта сыата.
- Мундуй судьуйа Айыыһыт Хотун туоһулуурун ирдиир.
- Олох муҥура биллибэт сарбынньахтарын сокуон хараҕар сөп түбэһиннэрэн дьуһуйүү уустук. Онон ханна да тиий, сокуон, тулатын түүннэри анаарар мэкчиргэлии, эргичиҥнэс төбөлөөх.
- Олох эрдэттэн сэрэппэт оҕуруктаах оҥоһуутун олуура уустук. Мэкчиргэ төбөтүнүү эргийэр сокуон киэбигэр киирбэт түгэнэ үгүс.
- Этиллибэтэх санаа дьууллэммэт.
- Сокуон хааччаҕа боотулу бүтэй буолбатах, күрүөһүлэммэт.
- Сүүстэн биир быт ытырара ордук кыһыылаах.
- Сокуон иэччэхтэнээри хааччахтыыр.
- Сокуон ылыллар сириттэн төһөнөн тэйэр да, туттуллар суутугар оччонон кыырыктыйан тиийэр.
- Сокуон содула иэччэхтээҕэр буолбатах, эргитээччитэ элбэҕэр.
- Сокуон убаастабылга наадыйбат, толорууну ирдиир.
- Сырдык тыыны быһыы олох оспот бааһа. Ону хаанынан иэстэһэ сатааһын бэйэни сарбыныы.
- Туора баай туоратыллар.
- Түрмэ оскуола буолбатах. Хаайыылаах – бэйэтэ бэйэтигэр учуутал.
- Тыйыс олох өһүөннээхтик дьигиһитэр модун сиидэтэ буруйдааҕы ылҕаан булар суостаах судьуйа буоларын умунума. Ол – олох бэйэтин ыраастанар ньымата.
- Уорбаланааччыта үгүс, уоруйаҕа соҕотох.
- Уустук сыһыан содула сокуон чопчу киэбигэр киирбэт буолан ылааччы.
- Хоноһону кэтэһиннэрэр күөс сойор.
- Хоруупсуйа ааһар хоноһо буолбатах, олосуйаары буулуур.
- Эт-тирии этиригинэн ситиһиллибит илгэ харыстанар.