Балаҕан ыйын 13 күнүгэр Е.А.Борисов аатынан Улуустааҕы киин библиотекаҕа ССРС уонна РСФСР норуотун үөрэҕэриитин туйгуна, «Учууталлар учууталлара», «Гражданскай килбиэн», «Эйэ көмүскэлин активиһа», «Чурапчы улууһун үөрэҕэриитигэр кылаатын иһин» бэлиэлэр хаһаайыннара, ССРС үлэтин, Саха Өрөспүүбүлүкэтин үөрэҕэриитин систиэмэтин Бочуоттаах, Чурапчы улууһун үөрэҕэриитин Бочуоттаах, Семен Андреевич Новгородов аатынан Чурапчы орто оскуолатын Бочуоттаах бэтэрээннэрэ, Семен Андреевич Новгородов аатынан Чурапчы орто оскуолатын Бочуоттаах учуутала, Чурапчы улууһун, Чурапчы, Сылан сэлиэнньэтин Бочуоттаах гражданиннара, «Сэрии сылларын оҕолоро» мэтээл хаһаайына, ытыктыыр, убаастыыр Анна Егоровна Гордеева туһунан кинигэ «Чурапчы улууһун учууталлара» серияҕа таҕыста.

Анна Егоровна Семен Андреевич Новгородов аатынан Чурапчы орто оскуолатын музейын тэрийбитэ, Чурапчы гимназиятыгар Степан Кузьмич Макаров аатын туруорсан иҥэрдэппитэ, Макаровтар учууталлар династияларын баһылыга, 2014 сыллаахха Туймаада ыһыаҕар Гиннес рекордун олохтооһуҥҥа кыттыбыта, Кытаанах орто оскуолатыгар, Дьокуускайдааҕы тыа хаһаайыстыбатын техникумугар, Чурапчы орто оскуолатыгар 50 сыл учууталынан, кылаас салайааччынан, завуһунан, музей директорынан, 18 сыл устата Дьахталлар оройуоннааҕы сэбиэттэригэр, ол иһигэр 8 сыл солбуйар, 10 сыл бэрэссэдээтэлинэн, оскуола,оройуон методическай холбоһугун салайааччытынан, Чурапчы сэбиэтин депутатынан, Эйэ фондатын активынан, РАЙОНО общественнай инстпекторынан үлэлээбитэ.

Кинигэ 2024 сыл Сайдам кинигэ кыһатыгар оригинал макета оҥоһуллан,, таҥыллан баран Дани Алмас типографияҕа бэчээттэнэн 120 экземлярынан күн сирин көрдө.
Кинигэни хомуйан оҥорбут Саха Өрөспүүбүлүкэтин үөрэҕэриитин үтүөлээх үлэһитэ Татьяна Егоровна Пономарева,методист-учуутал Татьяна Петровна Соловьева, строительнай хампаанньа бухгалтера Катерина Георгиевна Соловьева эдьиийдэрин, ийэлэрин, эбээлэрин Гордеева Анна Егоровна сырдык кэриэһигэр ананар.

 балта Мария Егоровна Макарова, быраата Иннокентий Егорович Макаров, сиэн балта Лена Ивановна Константиновна, сиэн балта Александра Максимовна Иванова матырыйаалы хомуйууга көмөлөстүлэр.

Кинигэ презентациятыгар Чурапчы улууһун аҕа баһылыга Степан Анатольевич Саргыдаев, Чурапчы үөрэҕэриитин управлениятын начальнига Юрий Платонович Посельскай, Чурапчытааҕы агротехническай колледж директора Василий Васильевич Гуляев эҕэрдэ тылларын салалта аатыттан тириэртилэр. 

Чурапчы орто оскуолатын С.А.Новгородов аатыттан музей директора Татьяна Кононовна Матвеева,

Чурапчы С.К. Макаров аатынан гимназиятыттан Оксана Степановна Данилова, Мария Иустиновна Хоютанова,

Чурапчы улууһун учууталларын сериятын олохтообут бииргэ үлэлээбит коллегата Виктор Семенович Дьяконов, Улахан-Күөл, Кытаанах, Чурапчы орто оскуолаларыгар бииргэ үлэлээбит коллегалара, үөрэппит оҕолоро, Анна Егоровна чугас аймахтара, бар дьоно кэлэннэр тоҕуоруһа мустаннар ахтан-санаан, эҕэрдэ тылларын анаатылар.

 ССРС уонна РСФСР норуотун үөрэҕэриитин туйгуна, бары убаастыыр, ытыктыыр учууталлар учууталлара Анна Егоровна Гордееваҕа анаан тахсыбыт кинигэ бэйэтин ааҕааччытын булан эдэр көлүөнэ иитээччилэргэ, учууталларга эппиэттээх үлэлэригэр сүбэһит, сырдыкка сирдээччи Остуол кинигэтэ буоларыгар эрэнэ хаалабыт.