70 сыл аннараа өттүгэр атырдьах ыйын 15 күнүгэр Чурапчы сиригэр-уотугар улахан судаарыстыбаннай диэйэтэл, Россия, Саха сирин биллиилээх политига, экономиһа, экономическэй наука доктора, Саха сирин үһүс Бэрэсидьиэнэ, бастакы Ил Дархана күн сирин кербүтэ. Егор Афанасьевич Борисов мээнэ киһи ыттыбат үрдэлигэр тахсан, политиканы өтө көрөр дьоҕурунан, Россия уонна Уһук Илин федеральнай уокурук салайааччыларын кытта уопсай тылы булар сатабылынан күн бүгүн дойду политикатын быһаарсар сенатор быһыытынан үлэлии сылдьан  бу улахан үбүлүөйүн көрсөрүттэн астынабыт-үөрэбит.

   Егор Афанасьевиһы Россия ааттаахтара бары билинэллэр, кини ону ситистэ билиитинэн-көрүүтүнэн, дьулуурунан, дьоҥҥо сыһыанынан, ханнык баҕарар үлэҕэ эппиэтинэстээҕинэн, ырааҕы өтө көрөр дьоҕурунан, төрөөбүт Сахатын сирин уонна кини норуотун таптыырынан. Кини боростуой инженертэн, слесарьтан саҕалаан араас үлэҕэ түһүүлэри-тахсыылары уҥуордаан самныбакка буһан-хатан, улахан салайааччы буола үүннэ, боростуой саха уола алаастан чыпчаалга таҕыста.

   Ханнык да киһи бу дойдуга салайааччы буолан төрөөбөт, кыраттан саҕалаан дьаныардаахтык үлэлээбит, бэйэтин билиитин-көрүүтүн көдьүүстээхтик сайыннарбыт киһи эрэ туох эмэ ситиһиилэнэр. Оннук киһинэн биһиги Егор Афанасьевиһы ааҕабыт. Кини дойду экономиката айгыраан эрэр 90-с сыллар саҕаланыыларыттан, уларыта тутуу сылларыгар, Россия уонна Саха сирэ саҥа ырыынак усулуобуйатыгар киирэн сыһыаннаһыыларыттан саҕалаан 2018 сылга дылы республика сайдыытыгар элбэҕи оҥордо.

   Кэлэр кэнэҕэски саха норуотун ыччатыгар кини үлэлээбит үлэтэ, кини олоххо тутуһан кэлбит принциптэрэ холобур буолуохтара. Ол курдук, 2016 сыллаахха Егор Афанасьевич дьиэ кэргэнин уонна Чурапчы улууһун администрациятын көҕүлээһининэн кини тус архив-библиотеката төрөөбүт Чурапчытыгар арыллан үлэтин саҕалаабыта. Библиотека фондатыгар күн бүгүн 100-н тахса хартыына, 4000 кэриҥэ кинигэ, 600-чэ араас дойдулартан сувенирдар дьон-сэргэ көрүүтүгэр-истиитигэр уонна туһаныытыгар кэлэн тураллар.

   Ытыктыыр,убаастыыр, киэн туттар биир дойдулаахпыт, бөдөҥ судаарыстыбаннай, политическэй диэйэтэл Егор Афанасьевич Борисов үбүлүөйдээх күнүгэр  анаммыт олоҕун, үлэтин сырдатар балаһаны уонна улуустааҕы киин библиотекаҕа «Норуотун  туһугар үлэ – олоҕун үрдүк анала” диэн  кинигэ киэҥ быыстапкатын билсиһэргитигэр ыҥырабыт. Быыстапка түһүмэхтэригэр олоҕун, үлэтин  кэрэһэлиир кинигэлэр, ахтыылар, ыстатыйалар, биобиблиографическай ыйынньыктар, альбом кинигэлэр уонна Егор Афанасьевич  үлэлэрэ турдулар.

Балаһа сигэтэ: МКУК «Чурапчинская межпоселенческая централизованная библиотечная система» | Борисов Егор Афанасьевич (muzkult.ru)