Айылҕа
- Алҕаска түбэспити айылҕа араарбат.
- Айылҕа айыыта тыйыһын иһин, сиэрдээх.
- Айылҕа быйаҥар киирбит киһи соллоҥун уҕарытар күүс айыллыбатах.
- Айылҕа ааттаһыннара, көрдөһүннэрэ үөрүйэх.
- Айылҕаҕа ой дуораана эрэ суолун-ииһин хаалларбат.
- Айылҕа утары уунар илиитэ киһитээҕэр кэччэгэй, көрөр хараҕа кыраҕы, истэр кулгааҕа чуор, үөкэйэ үгүс, иэстэһэрэ хабыр, өстүйдэҕинэ өһүөннээх.
- Айылҕа ыйыстыбытын төттөрү өҕүйэрин кэтэһимэ.
- Айылҕа, сыыһа үктэтээри, киһини үс атахтаан айбатах
- Бултуур ыыр – элбэх киһи аһыыр иһитэ. Кураанахтаама.
- Бэйэ дойдутугар соҕотох тиит да тыалтан хаххалаах.
- Кэм-кэрдии – айылҕа анаабыт суостаах судьуйата.
- Модун силистээх тиит баай лабаалара эрдэ көҕөрөллөр. Араҥ аҕа аһаах о5олоох.
- Өй-санаа дьарҕата эмэрин айылҕа аралдьытан аһарарын үрдүк Айыылар айбыттар.
- Үөрүүгүттэн эйгэ кытары сэргэхсийэр. Сэргэхсийбит эйгэ эмтээх.
- Сир-дойду быйаҥа баҕа хоту айыллыбат. Айбыт быйаҥын эйгэ бэйэтэ аттарар.
- Сир киһи баайа буолбатах. Киһи – сир баайа.
- Сир иэнэ көрдөххө киэҥ.
- Туһалаах сир өрүү кыараҕас.
- Сир инчэҕэй тирии буолбатах, иэнэ тэнийбэт.
- Киһи уонна халлаан чуумпуруута уһаабат.
- Сэргэхсиппит эйгэҥ күүскэр күүс эбэр.
- Эрэй-буруй эҥээрдээх олоххо үрдүк Айыыларынан анаппыт киһи аралдьытынар соҕотох көмүскэлэ-хаххата, санаата саппаҕырбыт сахтарыгар күүс-уох булунар тирэҕэ төрөөбүт алааһын иһирэх өйдөбүлэ, сирин-уотун өйүүр-тайыыр тыыныгар энчирээбэт эрэлэ.
- Этиҥ этэриттэн куттаматах куобах мутук тостор тыаһыттан куотар.