Муус устар 7 күнүгэр Е.А.Борисов аатынан киин бибилэтиэкэҕэ биир дойдулаахпыт Афанасий Петрович  Романов – Бабаҕа Баатыр “Чехославакияҕа кыайыы оһуохайа. Кырдьаҕас буойун кэпсээнэ. Осуохай победы на земле Чехословакии. Рассказ старого воина»  кинигэ сүрэхтэниитэ буолла. Кинигэ 2025 с. Дьокуускайга «Сайдам» кинигэ кыһатыгар 500 экземпляр тираһынан бэчээттэнэн тахсыбыт. Биһирэми ыытта Е.А.Борисов архыып-бибилэтиэкэтин отделын сэбиэдиссэйэ В.А.Платонова.Бу айымньыга Аҕа дойду Улуу сэриитигэр 1941 с. тылланан барбыт эдэр киһи, айылҕа оҕото, сахалыы мындырынан, булугас өйүнэн сатабыллаахтык дьаһанан сэрииттэн тыыннаах кэлбитэ кэпсэнэр. Бэйэтин олоҕун араас өрүттэригэр сыанабыллары оҥорбута кими баҕарар толкуйдатар, саҕар, ыччат билиҥҥи буккуурдаах кэмҥэ сөптөөх түмүктэри оҥосторугар өй угар.Бу айымньы уратыта — нууччалыы тылбааһа кинигэҕэ киллэриллибит. Тылбааһы Л.С.Борисова-Захарова талааннаахтык оҥорбут. Айымньы ааҕааччы киэҥ араҥатыгар ананар.Кинигэ биһирэмигэр кыттыыны ыллылар: автор Романов А.П.- Бабаҕа Баатыр, көрсүһүүнү көҕүлээччи Попов В.Е.,кинигэҕэ аан тылы суруйбут Саха суруйааччыларын сойууһун чилиэнэ Г.И.Адамов, Улуус бэтэрээннэрин сэбиэтин бэрэссэдээтэлэ Матвеева М.Н., бииргэ үөрэммит табаарыстара, үөлээннээхтэрэ уонна Чурапчытааҕы Аграрнай-техническэй колледж устудьуоннара. Автор кэлбит ыалдьыттарга кинигэтин туһунан уонна үлэтин инники былааннарын билиһиннэрдэ. Бу кинигэ Аҕа дойду улуу сэриитигэр Кыайыы 80 сылын көрсө уонна Дойдуга Аҕа дойдуну көмүскээччилэр сылларынан таһаарыллыбытын бэлиэтээтэ. Санааларын астастаспыт дьон айымньыны биһирииллэрин, авторы интэриэһиргээбиттэрин биллэрдилэр,эҕэрдэлэрин, махталларын тиэртилэр.