Ааҕыы эйгэтэ: сонун саҕалааһын

  • 28.11.2025
  • 76

Хас биирдии төрөппүт оҕото ситиһиилээх, киэҥ билиилээх, санаатын толору этэр, уус-уран тыллаах буола улаатарыгар баҕарар. Оттон оннук хаачыстыбалары  кинигэни элбэхтик ааҕар киһи түргэнник баһылыыр. Тоҕо диэтэргин, ааҕыы — мэйии дьарыга буолар. Онон оҕолорбутугар олох кыра эрдэхтэриттэн кинигэҕэ тапталы үөскэтэ, оскуолаҕа бардахтарына ааҕыыга интэриэһи тардарга дьулуһуохтаахпыт. Кыра оҕо төрөппүттэрин көрөн улаатар, кинилэри холобур оҥосторун бары билэбит. Төрөппүт бэйэтэ кинигэни ааҕар, сэҥээрэр буоллаҕына оҕото ааҕыыга интэриэстээх буолара саарбаҕа суох. Онон Егор Афанасьевич Борисов аатынан киин библиотека уонна Прасковья Ильинична Борисова аатынан “Улыбка” уһуйаан холбоһуктаах дьиэ кэргэнинэн ааҕыы бырайыактарын саҕалаатылар.

Бырайыак сыала-соруга:

Дьиэ кэргэнинэн ааҕар дьоҕурдарын сайыннарыы, библиотекаҕа сылдьар интэриэстэрин тардыы, саҥа сонун, интэриэһинэй кинигэлэри кытта билиһиннэрии, айар сатабылларын көҕүлээһин, төрөппүттэри ааҕыы эйгэтигэр угуйуу.

Бырайыак аһыллыытын тэрээһинэ Борисов аатынан киин библиотекаҕа экскурсияттан саҕаланна. Егор Афанасьевич олоҕун, үлэтин туһунан сырдатылынна.

“Оҕо кыра эрдэҕиттэн кинигэҕэ сыһыннаҕына, библиотекаларга сылдьар буоллаҕына Ааҕыыга интэриэһэ күүстээх буолара саарбаҕа суох. Онон Борисовтар дьиэ кэргэн аатын сүгэр уһуйаан уонна библиотека сүбэлэһэн биир группа оҕолорун, төрөппүттэрин ылан бу бырайыакка кытыннаран көрөргө сананныбыт. Үс сыл устата араас хабааннаах тэрээһиннэр, үлэлэр, мониториннар ыытыллыахтара. Уһуйааны бүтэрэн тахсалларыгар бу группа оҕолоро атын оҕолортон уратылаахтарын, кинигэҕэ интэриэстэрэ үрдээбитин кэтээн көрөн түмүк оҥоруохпут. Бары төрөппүттэри библиотекаҕа сылдьаргытыгар ыҥырабыт” — диэн директор Айталина Михайловна Смирникова төрөппүттэргэ анаан санаатын эттэ. “Төрөппүт Бэйэтэ кинигэни ааҕар буоллаҕына оҕотун ааҕыыга уһуйар. Оҕо төрөппүтүн көрөн кинигэҕэ тардыһар интэриэһэ күүһүрэр. Билиҥҥи кэмҥэ кинигэ сыаната олус ыарахан. Баҕарбыт кинигэбитин сатаан ылан ааҕар кыахпыт суох курдук. Ол иһин, библиотекаҕа сылдьан  араас кинигэлэри уларсан ааҕыаххытын сөп. Бу бырайыак чэрчитинэн төрөппүттэргэ араас хабааннаах тэрээһиннэр, оонньуулар, күрэхтэр, интэриэһинэй көрсүһүүлэр, кинигэ тула кэпсэтиилэр уо.д.а. ыытыллыахтара. Ыытыллар тэрээһиннэргэ бары көхтөөтүк кыттыаххыт, сылдьыаххыт диэн эрэнэбит. Бырайыакпыт уһуйааны бүтэрдэхтэринэ  оскуолаҕа эмиэ салҕыы үлэлииригэр баҕарабыт” — диэн уһуйаан сэбиэдиссэйэ Екатерина Семеновна Иванова санаатын үллэһиннэ.  Уһуйаан методиһа Алена Леонидовна Бурцева бырайыак ис хоһоонун кытта билиһиннэрдэ. Бу үөрүүлээх тэрээһиҥҥэ кэлбит дьиэ кэргэттэргэ ааҕааччы буолбуттарын туоһулуур Ааҕааччы билиэтин уонна ааҕыы трекера туттарылынна. Оҕо библиотекатын сэбиэдиссэйэ Ольга Гаврильевна Эверстова “Аптаах саппыйачаан” бырайык туһунан кэпсээтэ уонна кинигэлэрдээх саппыйалары төрөппүттэргэ туттарда. Түмүгэр Борисов центр отделын сэбиэдиссэйэ Вера Аполлоновна  Платонова кинигэ быыстапкаларын билиһиннэрдэ, төрөппүттэри библиотекаҕа сылдьалларыгар ыҥырда.

Добавить комментарий