Ааҕыы эйгэтэ
Ааҕааччыларбыт элбэхтэ уларсан аахпыт, биһирээбит саха суруйааччыларын айымньыларын билиһиннэрэбит. Кинигэлэргэ араас дьылҕалаах дьон олоххо дьулуурдара, таптал, сиэр-майгы урукку уонна билиҥҥи олоҕу кытта ситимнэнэн ойууланаллар. Уус-уран тылынан итэҕэтиилээхтик суруллубут айымньылар киһини толкуйдаталлар, дууһаны-санааны долгуталлар, сырдыкка-үтүөҕэ сирдиир үтүө тыыннаахтар. Кинигэлэри киин библиотека абонемент салаатыттан уларсыҥ, ааҕыҥ, сэргээҥ!
Пономарев, Дмитрий Николаевич. Биһик : сэһэн, кэпсээн / Дмитрий Пономарев -Дьолуолаах. — Дьокуускай: Айар, 2022. — 80 с.
Бу кинигэҕэ ааптар сэрии ыар сылларыгар Чурапчытааҕы көһөрүүгэ чугас дьонун, балтын сүтэрэн төгүрүк тулаайах хаалбыт Сэмэнчик эрэйдээх оҕо сааһын, маҥнайгы таптал ааспат- арахпат амтанын, таҥнарыыны, кэлэйиини саастарын тухары ындыы гынан илдьэ сылдьыбыт сүтэрсибит сүрэхтэр дьылҕаларын туһунан олус итэҕэтиилээхтик суруйбутун киһи уйадыйбакка аахпат. Ааптар олоххо буолбут түбэлтэлэри сэһэргиирэ, киһи хараҕар дьиҥ чахчытык ойууланан, туспа тыыннанан тыҥаан кэлэллэр.
Сэгэлдьийэ Чээлэй. Күнүү : кэпсээннэр / Сэгэлдьийэ Чээлэй. — Дьокуускай : Айар, 2022. — 64 с.
Ирина Харайданова-Сэгэлдьийэ Чээлэй бу кинигэтигэр оҕо саас умнуллубат өйдөбүллэрин, бастакы булт үөрүүтүн, ийэ оҕоҕо тапталын, эр киһи уонна дьахтар сыһыаннарын, сиэр-майгы, олох туһунан кэпсээннэрэ киирдилэр. Кэпсээннэр киһини олоххо буолар араас быһыы-майгы киһи дьылҕатыгар оруолун, сирдээҕи анал, төлкө туһунан толкуйдаталларынан кэрэхсэбиллээхтэр.
Захаров, Петр Иванович. Хирург сэһэнэ / Петр Захаров. — Дьокуускай: Айар, 2025. — 368 с.
Саха сиригэр сүрэх-тымыр ыарыыларын хирургиятын төрүттээбит, элбэх дьону өлөр өлүүттэн өрүһүйбүт сүнкэн үтүөлээх кардиохирург Захаров П.И. кардиохирургия бастакы үрдүк ирдэбиллээх уонна өрө көтөҕүллүүлээх кэмнэрин, атаҕар туруутун, өр сыллаах сыралаах үлэтин ахтар, баай уопутуттан, араас уустук эпэрээссийэлэрин түгэннэриттэн үллэстэр, ааҕааччыга сүбэ-ама биэрэр.
Попова, Лариса Николаевна. Ойуун уол таптала : сэһэн / Көҥүл Кыыс. — Дьокуускай: Бичик, 2017. — 96 с.
Айылҕаттан айдарыылаах ураты дьон сахаларга уруккуттан бааллар. Налык эмиэ оннук үөһэттэн ананан кэлбит оҕо. Кини оонньуур, мэниктиир, улаатан ситэр сааһыгар таптал истиҥ иэйиитигэр уйдарар. Эрчимнээх, бэйэтин күүһүгэр-кыаҕар эрэллээх эдэр уолу араас үөрүүлээх түгэннэр, хомолтолоох түбэлтэлэр күүтэллэр, өйүүр-өйдүүр дьоннор, күрэс былдьаһааччылар да көстөллөр. Ааҕааччы бу ис киирбэх майгылаах ойуун уолу кытта төрүөҕүттэн саҕалаан аналын булуор диэри тэҥҥэ айанныа.