«Ааҕар саха сайдам ыала»

“Ыал саргыта” Чурапчы улууһун пилотнай бырайыагын иһинэн сыл устата ыытыллыбыт “Ааҕар саха сайдам ыала” күрэх түмүктэннэ. Барыта 20 ыал түмүктүүр тэрээһиҥҥэ кыттыыны ылла.  Күрэх дьиэ кэргэнинэн ааҕыыны сайыннарыыга, өйөөһүҥҥэ, көҕүлээһиҥҥэ уонна бибилэтиэкэлэр бу хайысхаҕа үлэлэрин күүһүрдүүгэ, атын тэрилтэлэри киэҥник кытыннарыыга аналлаах сыаллаах-соруктаах ыытылынна. Күрэх ыалы ааҕыыга сыһыарыыга уонна нэһилиэнньэ ортотугар ааҕар култуураны иитиигэ туһуланна.

            Сыл устата дьиэ кэргэн библиотекаҕа сылдьан, үгүс кинигэни ааҕан, оҕолоругар кинигэҕэ тапталы иҥэриилэрин уопутуттан, саха суруйааччыларын айымньыларын ааҕан, ырытыһан видеоролик устан түмүктүүр тэрээһиҥҥэ кытыннылар. Дьүүллүүр сүбэ быһаарыытынан 1 миэстэни Чурапчы нэһилиэгиттэн Винокуровтар, 2 миэстэни Мугудай нэһилиэгиттэн Ивановтар, 3 миэстэни Мырылаттан Николаевтар дьиэ кэргэттэрэ ыллылар. “Ааҕыыга айар сыһыан” анал аат иҥэрилиннэ Болтоҥоттон Оконешниковтар дьиэ кэргэттэригэр. “Ааҕыыга сыһыарыы уопута” анал ааты Одьулуун нэһилиэгин Седалищевтар дьиэ кэргэттэрэ ыллылар. Кыайыылаахтары итиитик-истиҥник эҕэрдэлиибит! Куруук кинигэҕэ тапталгыт уостубатын, библиотекаҕа сылдьа, оҕолоргутун ааҕыы эйгэтигэр умсугута турун. Кыайыылаахтары наҕараадалааһын Ахсынньы 12 күнүгэр “Ыал саргыта” форумҥа ыытыллыаҕа.