Аҕам саастаахтар күннэрэ
Аан дойдутааҕы аҕам саастаахтар күннэринэн Чурапчыбыт улууһун нэһилиэнньэни кытта үлэлиир социальнай көмүскэл управленията, дьиэ кэргэҥҥэ элбэх өҥөнү оҥорор киин уонна Е.А.Борисов аатынан киин библиотека үлэһиттэрэ холбоһоннор ытык саастаах нэһилиэкпит олохтоохторугар бэрт сэргэх тэрээһини ыыттылар. Тэрээһин социальнай управление салайааччыта Лидия Васильевна Тосукаева эҕэрдэ тылынан саҕаланна. Бу күн ытык саастаах дьоммутун С.А. Новгородов аатынан Чурапчы орто оскуолатын VII кылааһын үөрэнээччилэрэ кэлэн эҕэрдэлээтилэр. Уолаттар Роман Данилов «Иэйии» хоһоонун ааҕан иһитиннэрдилэр, кыргыттар бэйэлэрин илиилэринэн оҥорбут телефон угар кыра мөһөөччүктэрин бэлэхтээннэр олус үөртүлэр.
Библиотека үлэһиттэрэ саха литературатыгар сыһыаннаах викторинаны , өс хоһооннору таайыыга күрэх, илии хамсаныыларыгар, мэйии үлэтигэр сөптөөх оонньуулары ыыттылар, передвижной библиотека үлэтин, улахан шрифтээх журналлары, кинигэлэри, аудиокинигэлэри билиһиннэрдилэр.
Ону тэҥэ тэрээһин кыттыылаахтара икки бөлөххө арахсаннар гипсэнэн оҥоһукка уонна күлүүс угар ключница тигиитигэр маастар кылаас ыланнар олус дуоһуйдулар, астыннылар, сэргэхсийдилэр. Маастар кылааһы норуот маастара Надежда Прокопьевна Ахматова уонна бизнес-инкубатор резидена Татьяна Семеновна Ефграфова ыыттылар.
Аҕам саастаах дьоннорбут чөл туруктаах,үөрэ-көтө сырыттынар, чэгиэн-чэбдик буоллунар диэн баҕа санаабытын этэбит.
