«Чолбон өй күрэһэ» оонньуу
Бүгүн «Чолбон» сурунаал редакцията үһүс төгүлүн «Чолбон өй күрэһэ» улуустааҕы түһүмэҕэ Е.А.Борисов аатынан киин бибилэтиэкэ былаһааккатыгар буолла. Быйылгы күрэх сурунаал тэриллибитэ 100 уонна бастакы эрэдээктэр Анемподист Софронов төрөөбүтэ 140 сылларыгар ананна. Күрэс сыала-соруга: дьиэ кэргэн болҕомтотун Саха уустарын литературатыгар тардыы, сахалыы уус-уран литератураны ааҕыыны көҕүлээһин, сахалыы ааҕар, литератураны таптыыр дьону булан түмүү, иитии уонна өйөөһүн.
Чурапчы улууһуттан уопсайа уон хамаанда куйаар ситиминэн оонньууга кытыннылар. Ол курдук Чурапчы, Одьулуун, Чакыр, Бахсы, Алаҕар, Мугудай, Кытаанах, Школа интернат, Арыылаах, Хадаар нэһилиэктэриттэн үстүү киһилээх хамаанда тэринэн сүрдээх интэриэһинэйдик күрэхтэстилэр. Кыттааччылар «Софронов-Алампа олоҕо, айар үлэтэ», «Чолбон сурунаал уонна Саха литературата»,»Саха театра», «Билиҥҥи кэм литературата» диэн 4 түһүмэх боппуруостарыгар эппиэттээтилэр. Оонньуу түмүгүнэн саамай элбэх баалы хомуйан Чакыр нэһилиэгиттэн «Үргэл» хамаанда бастакы миэстэни ылла, иккис миэстэни Одьулуун, Алаҕар, үһүс миэстэни Чурапчы, Кытаанах хамаандалара үллэһиннилэр. Кыайыылаах Чакыр хамаандата тохсунньу ыйга куоракка бэчээт дьиэтигэр полуфиналга Чурапчы улууһун чиэһин көмүскүөҕэ, салҕыы кыайбыттар Дьокуускай куоракка «САХА» НКИК быһа эфиригэр финалга кыттыахтара.
