Улуус администрациятын аактабай саалатыгар бу дьыл алтынньы 13 күнүгэр Үлэ Кыһыл Знамя уордьан кавалера, норуот хаһаайыстыбатын үтүөлээх үлэһитэ, Эрилик Эристиин аатынан холкуоска, кэлин сопхуоска өр сылларга партком сэкирэтээринэн, нэһилиэк сэбиэтинэн үлэлээбит Дмитрьев Николай Степанович уонна олоҕун аргыһа ССКП XXII съеһин делегата, «Үлэ Кыһыл Знамята” уордьан кавалера, Саха АССР Үрдүкү Сэбиэтин VI ыҥырыылаах мунньаҕын депутата, икки төгүл оройуон, түөрт төгүл нэһилиэк сэбиэтин депутата, обком чилиэнигэр кандидат, партия XXII съеһин делегата, «Бочуот Знага» уордьан кавалера, чулуу ыанньыксыт, оройуон чөмпүйүөн осменатора, 1985 сылтан республиканскай суолталаах персональнай пенсионер, Парасковья Осиповна Дмитрьевтар дьиэ кэргэн олорон ааспыт олохторун, үлэлэрин сырдатар «Үлэһит дьиэ кэргэн аата үйэлэргэ умнуллубат» кинигэ сүрэхтэниитэ буолан ааста.   Кинигэ ис тутулун Улуустааҕы кииннэммит библиотечнай ситим директора Платонова В.А. сиһилии билиһиннэрдэ. Кинигэ Дьокуускай куоракка «Дани-Алмас» кинигэ кыһатыгар 2022 сыллаахха 130 экземплярынан, 240 страницалаах, «Чурапчы чулуу дьоно» сериянан бэчээттэнэн таҕыста. Кинигэни Саха Өрөспүүбүлүкэтин култууратын туйгуна, Дириҥнээҕи «Үрдэл» норуот айымньытын дьиэтин методиһа, «Утум» кыраайы үөрэтээччилэр түмсүүлэрин салайааччыта Клара Максимовна Тарабукина хомуйан оҥордо. Кинигэ киирии тылын Клавдия Максимовна Тарабукина, Парасковья Осиповна Дмитрьева, РФ сэбиэтин анал комитетын солбуйааччы бэрэссэдээтэлэ Егор Афанасьевич Борисов, СӨ тыатын хаһаайыстыбатын үтүөлээх үлэһитэ, СӨ Ытык Сүбэтин чилиэнэ Иннокентий Николаевич Аммосов, 2013-2021 сс. Чурапчы улууһун аҕа баһылыга Андрей Тимофеевич Ноговицын, «Хоптоҕо нэһилиэгэ» МТ баһылыга Борис Петрович Архипов суруйдулар. Ааспыт кэм бастыҥ үлэһиттэрин – Николай Степанович уонна Парасковья Осиповна үтүө сырдык ааттара көмүс буукубанан үйэтиллэр толору кыахтаахтар диэн ахтан-санаан истиҥ-иһирэх тылларынан ахтыбыттар. Кинигэ биэс түһүмэхтэн турар: Кэрэ киһи, үтүөкэн салайааччы (Николай Степанович олоҕун кэрчик кэмнэрин, үлэлээбит сылларын туһунан ахтыылар), Николай Степанович Дмитрьев суруйуулара, ыстатыйалара, Бастыҥ үлэһит, иһирэх ийэ, эйэҕэс эбэ – Парасковья Осиповна Дмитрьева (Парасковья Осиповна олоҕун кэрчик кэмнэрин, үлэлээбит сылларын туһунан ахтыылар), Аймах-билэ дьонноругар истиҥ сыһыаннаахтара (аймахтар ахтыылара), Тапталбыт, махталбыт уостубат (оҕолорун, сиэннэрин ахтыылара) түмүлүннүлэр.   Сүрэхтэниигэ ахтыы тылы оҥордулар: «Чурапчы улууһа (оройуона)» МТ депутаттарын сэбиэтин бэрэсэдээтэлэ Захаров А.А., улуус бэтэрээннэрин сэбиэтин бэрэсэдээтэлэ Матвеева М.Н., СӨ норуотун хаһаайыстыбатын үтүөлээх үлэһитэ Сергеев С.И., СӨ үтүөлээх агранома Чичигинаров В.П., Ил Түмэн норуодунай депутата Никитин С.И., үлэ бэтэрээнэ Федулова Х.П., СӨ тыатын хаһаайыстыбатын туйгуна Кузьмина А.П., СӨ государственнай сулууспатын туйгуна Попов Н.Н. уо.д.а. үтүө дьон ааттара үйэлэргэ умнуллубакка, дьоҥҥо-сэргэҕэ туһалаах ыччаттары кинилэр холобурдарыгар иитиллэн тахсалларыгар баҕардылар.