Балаҕан ыйын 3 күнүгэр Чурапчы нэһилиэгэр бэлиэ тэрээһин ыытылынна. Д.П.Коркин аатынан Чурапчытааҕы республиканскай спортивнай олимпийскай эрэллэри бэлэмниир орто интернат-оскуолатыгар Саха сирин тустуутун аан дойдуга таһаарбыт, чулуу бөҕөстөрү иитэн таһаарбыт бастакынан көҥүл тустуу оскуолатын тэрийбит Саха АССР, РСФСР, ССРС үтүөлээх тренерэ, Саха АССР үтүөлээх учуутала Дмитрий Петрович Коркин төрөөбүтэ 95 үбүлүөйдээх сылыгар анаан Олимпийскай чемпион Павел Пинигин “Мой учитель Дмитрий Коркин. Путь к триумфу” диэн кинигэтин сүрэхтэниитэ буолла.

  Кинигэ Красноярскай куоракка “Инспаер” кинигэ кыһатыгар тупсаҕай оҥоһуулаах 260 страницалаах, халыҥ переплеттаах, 1000 экземплярынан бэчээттэнэн тахсыбыт. Кинигэни “Инспаер” кинигэ кыһатын директора Вячеслав Шаманскай бырайыагынан, суруналыыс Александр Ильин — Егоров редактордаан, педагогическай наука доктора Валерий Усаков, педагогическай наука кандидата Петр Кривошапкин, ССРС успуордун маастара Михаил Друзьянов консультаннаан таһаарбыттар. Кинигэ сүрэхтэниитэ Акулина Кузьмина салайар «Хотой» спортивнай оскуола үөрэнээччилэрин бөлөҕүн толоруутугар «Тустуу — олох философията» дьүһүйүүттэн саҕаланна. Ыытааччы улуустааҕы киин библиотека ааҕааччыны кытта үлэлиир отдел сэбиэдиссэйэ М.Н. Кузьмина тэрээһин кыттыылаахтарыгар кинигэ тутулун, ис хоһоонун саас сааһынан ырытан, толору билиһиннэрдэ. Кинигэ элбэх сэдэх матырыйаалларынан, эрдэ ханна да тахсыбатах уникальнай хаартыскаларынан ситэриллибит. Ааптар Павел Пинигин: «Бу төрдүс кинигэм буолар, сериянан тахсан иһэр кинигэлэр буолаллар. Учууталбар, настаабынньыкпар үбүлүөйдээх сылынан ытык иэспин толордум». Ааптар чулуу тренер дьоһун, чаҕылхай олоҕун уонна үлэтин туһунан кинини кытта бииргэ үлэлээбит,алтыспыт дьон, кини үөрэнээччилэрэ, чугас дьонун, аймахтарын үгүс ахтыыларын хомуйан арылхайдык сырдаппыт. Кинигэ сүрэхтэниитигэр ыраахтан-чугастан ыалдьыттар Д.П. Коркин үөрэнээччилэрэ, спорт ветераннара, тренердэр, учууталлар, спорду сэҥээрээччилэр кыттан Павел Павловиһы эҕэрдэлээн бэйэлэрин санааларын үллэһиннилэр. Кинигэ сүрэхтэниитин үөрүүлээх чааһыгар улуус баһылыга Степан Саргыдаев, успуорт миниистирэ Леонид Спиридонов уо.д.а эҕэрдэ тылларын эттилэр, киэн тутталларын биллэрдилэр.

  Кэлбит ыалдьыттар бу кинигэ улуу тренер аатын үйэтитиигэ дьоһун кылаат буоларын бэлиэтээн туран иитэр-үөрэтэр ис хоһооно баайын сыаналаатылар. Кинигэҕэ Дмитрий Петрович олоҕун, ону таһынан научнай үлэлэрэ сырдатыллан тахсыбыттара киэҥ сэҥээриини ылла. «Научнай хайысхалаах түһүмэхтэрэ тренердэргэ, тустууктарга, атын да исписэлиистэргэ олус наадалаахтар. Бэйэлэрин үлэлэригэр туһаныахтара диэн эрэнэбин” диэн ааптар санаатын эттэ. Кинигэ түмүгэр эдэр көлүөнэ тустууктар көрөн үөрэниннэр, сайыннынар диэн кюар-кодтаан Павел Пинигин таптаан туттар, короннай сэттэ приемун киллэрбит. Кинигэ нууччалыы суруллубут эбит буоллаҕына, бу түһүмэҕи саха ыччатыгар диэн анаан сахалыы тылынан таһаарбыт.  Олимпийскай чемпион Павел Пинигин Улуустааҕы киин библиотекаҕа кинигэтин бэлэх уунна. Улуу тренер, учуутал, настаабынньык Дмитрий Петрович Коркин төрөөбүтэ 95 сылыгар ананан тахсыбыт саҥа кинигэ дьон-сэргэ киэҥ сэҥээриитин ылыа, кэлэр көлүөнэ ыччакка туһалаах буолуо диэн эрэнэбит.