Е. А Борисов аатынан улуустааҕы киин библиотекаҕа бүтүн Арассыыйатааҕы библиотека күнэ бэлиэтэннэ. Үөрүүлээх тэрээһиҥҥэ улуус библиотечнай ситимин үлэһиттэрэ, библиотека ветераннара муһуннулар. Бу бэлиэ күҥҥэ нэһилиэнньэ киэҥ араҥатыгар сырдатыыга үгүс өрүттээх үлэни тэрийэр, кинигэ кэрэ эйгэтигэр сирдиир, ааҕыыны көҕүлүүр күннэтэ айымньылаахтык, таһаарыылаахтык үлэлии айа — тута сылдьар библиотека үлэһиттэригэр истиҥ эҕэрдэ тыллара этилиннилэр, наҕараадалар туттарылыннылар. Чурапчытааҕы библиотечнай ситим директора Вера Платонова өр сылларга үтүө суобастаахтык, идэлэригэр бэриниилээхтик үлэлээбит ветеран библиотекардары уонна библиотека үлэһиттэрин эҕэрдэлээн туран наҕараадалары туттарда. СӨ Национальнай библиотекатын Бочуотунай грамотатынан Кытаанах модельнай библиотекатын сэбиэдиссэйэ Лена Пономарева, Махтал суругунан Хоптоҕо библиотекатын сэбиэдиссэйэ Марианна Толстоуховаҕа наҕараадаланнылар. Улуус баһылыгын социальнай боппуруоска солбуйааччыта Мария Кронникова улуус баһылыгын Бочуотунай грамотатын Хадаар модельнай библиотекатын сэбиэдиссэйигэр Лена Ноговицынаҕа туттарда. Чурапчы улууһун культураҕа управлениятын начальнига Пётр Гуляев «Чурапчы улууһун культура уонна искусство эйгэтигэр кылаатын иһин» Бочуоттаах бэлиэни киин библиотекаҕа өр кэмҥэ таһаарылаахтык, айымньылаах үлэлээбит Дария Егасоваҕа уонна Наталья Захароваҕа, “Чурапчы улууһун култууратын ветерана” Бочуоттаах бэлиэни Сылан модельнай библиотекатын сэбиэдиссэйигэр Анастасия Аммосоваҕа, киин библиотека ааҕааччыны кытта үлэлиир отдел сэбиэдиссэйигэр Марфа Кузьминаҕа, культура управлениятын Бочуотунай грамоталарын Одьулуун модельнай библиотекатын сэбиэдиссэйигэр Таисия Григорьеваҕа, улуустааҕы киин библиотека сүрүн библиотекарыгар Вероника Марковаҕа,Төлөй саҥа көлүөнэ модельнай библиотекатын сүрүн библиотекарыгар Айлаана Габышеваҕа, Хадаар уонна Болтоҥо модельнай библиотекатын үлэһиттэригэр Валентина Сидороваҕа, Сахаяна Дьяконоваҕа туттарда. Өрөспүүбүлүкэтээҕи культура үлэһиттэрин идэлээх сойуустарын Махтал суруга Мындаҕаайы модельнай библиотекатын сэбиэдиссэйигэр Татьяна Егороваҕа тутарылынна. Культура эйгэтин директордарын сэбиэтин бэрэссэдээтэлэ Лена Борисова улуус нэһилиэктэрин норуот айымньыларын дьиэлэрин, культуратын тэрилтэлэрин салайааччыларын ааттарыттан эҕэрдэ суругу туттарда уонна бөдөҥ сууммалаах сертификаты библиотекаҕа бэлэхтээтэ. Улуус үөрэх управлениятын уопсай үөрэхтээһинин уонна методическай хааччыйыы сүрүн специалиһа Мария Артемьева оскуоланы кытта ситимнээхтик үлэлиир Хайахсыт библиотекатын сэбиэдиссэйигэр Николай Хоютановка, Чакыр библиотекатын сэбиэдисэйигэр Светлана Михайловаҕа, Болтоҥо библиотекатын сэбиэдиссэйигэр Лена Картузоваҕа Махтал суруктары туттарда. Үөрүүлээх тэрээһиҥҥэ культура управлениятын начальнига Петр Гуляев улууспут норуотун маастардара төрүт култуурабытын, духуобунай баайбытын кэрэһэлиир сиэдэрэй оҥоьуктарын сырдатар открыткаларын 21 оскуола уонна 19 нэһилиэк библиотекаларыгар бэлэхтээтэ. Дьоро тэрээһин кэрэни, үтүөнү, билиини тарҕатар сырдык эйгэлээх библиотека үлэһиттэригэр ананан ылбаҕай ырыанан, хомоҕой хоһоонунан, истиҥ эҕэрдэ тылларынан доҕуһуолланан үөрүүлээх быһыыга-майгыга ааста.
