Тохсунньу 24 күнүгэр «Айылгы»оройуоннааҕы  норуот айымньытын дьиэтигэр саха сиригэр физкультурнай хамсааһын 100 сылын чэрчитинэн    Саха АССР культуратын үтүөлээх үлэһитэ, РСФСР ДСО «Урожай» бочуоттаах чилиэнэ,  ССРС   физическай культуратын туйгуна,  Чурапчы улууһун  спордун  тэрийээччитэ, салайааччыта Афанасий Кирикович Софронов төрөөбүтэ 95 сылын бэлиэтиир дьоро тэрээһин ыытылынна. Бу бэлиэ күҥҥэ ыраахтан чугастан ыҥырыылаах ыалдьыттар,  спорт бэтэрээннэрэ, спорду сэҥээрээччилэр, А.К .Софронов  бииргэ үлэлээбит, алтыспыт дьоно — сэргэтэ, аймахтара, эдэр ыччат кыттыыны ыллылар. Улуус баһылыга Степан Саргыдаев талааннаах тэрийээччи,  улууска спорт сайдыытыгар биллэр- көстөр суолу хаалларбыт, киэн туттар   биир дойдулаахпыт Афанасий Кирикович  олоҕун, үлэтин,  республика, улуус спордун  сайдыытыгар киллэрбит  сүҥкэн кылаатын туһунан ахтыы оҥордо. Үөрүүлээх тэрээһиҥҥэ Чурапчы улууһун, нэһилиэгин физическэй култууратын уонна успуордун сайыннарыыга өр сыллаах, үрдүк таһаарыылаах үлэтин, улуус ыытар уопсастыбаннай хамсааһыннарыгар көхтөөх кыттыыларын иһин “Чурапчы улууһун бочуоттаах бэтэрээнэ” бэлиэ РФ уонна СӨ норуотун хаһаайыстыбатын үтүөлээх үлэһитигэр  Альбина Поисееваҕа, успуорт бэтэрээнэ, РСФСР норуотун үөрэҕириитин туйгунугар Виталий Неустроевка, көҥүл тустууга СССР успуордун маастара, Чурапчы улууһун бочуоттаах олохтооҕор Семен Макаровка, Чурапчытааҕы аграрнай-техническэй кэллиэс успуорт инструкторыгар Анатолий Ефремов туттарылынна.    Тэрээһиҥҥэ  Чурапчы оройуонугар  Афанасий Кирикович үлэлээбит  кэмин саҕаттан  бу күҥҥэ дылы спорт сайдыытын көрдөрөр стендэлэр, Амматтан спорт суруналыыһа М. В Алексеев саха сирин спордун историятын, чулуу спортсменнарын сырдатар  интириэһинэй  баай матырыйаала, Чурапчы нэһилиэгиттэн коллекционер Иван Николаевич Попов  Россия, Саха сирин спортивнай  күрэхтэһиилэрин кэрэһэлиир   значоктора, бэлиэлэрэ кэлбит ыалдьыттар болҕомтолорун ыллылар. Улуустааҕы киин библиотека А. К. Софронов  олоҕун, үлэтин сырдатар «Спорт уһулуччулаах тэрийээччитэ»  кинигэ быыстапкатын тэрийдэ. Кэлбит ыалдьыттар  улууспутугар маассабай спорду көҕулээбит, уһулуччулаах салайааччы туһунан, спорт сайдыытын, спортсменнарын туһунан кинигэлэри сэргээн көрдүлэр, аахтылар. Улууспутугар быйыл Чурапчы  нэһилиэгэ 375 сылын бэлиэтиир  улахан үлэлэр ыытылла тураллар. Биир улахан бырайыагынан А. К. Софронов аатынан саҥа спортивнай саала үлэҕэ киирэрэ былааннанар. Чурапчы дьоно — сэргэтэ  саҥа спорт саалатын арыллыытын долгуйа күүтэбит уонна чулуу киһибит  аата  үйэлэргэ ааттанан, кэлэр кэнчээри ыччакка  үтүө холобур буолан  Чурапчы буоруттан  чулуу спортсменнар иитиллэн, үүнэн сайдан тахсыахтара   диэн эрэнэбит !