Улуустааҕы киин библиотека ааҕар саалатыгар  алтынньы 14 күнүгэр Аан дойдуга кыыс оҕо, Саха сиригэр Ийэ күннэригэр аналлаах “Социальная роль женщины в современном мире” диэн төгүрүк остуол буолан ааста.  Көлүөнэлэр ситимнэрэ быстыбат айылгылааҕын, салҕанар уһун тыыннааҕын  Василий Петров – Айыл “Сэттэ кэрэ кэрдиис кэмэ” айымньытынан библиотека коллективын толоруутугар арыйдылар. “Чурапчы улууһа (оройуона)” муниципальнай тэриллии баһылыгын социальнай боппуруостарга солбуйааччы М.Ф. Кронникова истиҥ эҕэрдэтин тиэртэ. Бу күн “Матери России” Бүтүн Россиятааҕы хамсааһын Чурапчытааҕы салаатын председатели солбуйааччы Екатерина Ивановна Егорова,  педагогическай наука кандидата, доцент, СӨ физкультураҕа уонна спортка туйгуна, СӨ үөрэҕириитин туйгуна Светлана Степановна Гуляева, элбэх оҕолоох күн күбэй ийэтэ, «Материнская слава”,  “Родительская слава России” уордьаннарын,  «Күн күбэй ийэ» бэлиэ хаһаайына,  «Урааҥхай» фермерскай хаһаайыстыба салайааччыта Евдокия Николаевна Таныкова,  элбэх оҕо күн күбэй ийэтэ, Дьахтар сэбиэтин чилиэнэ Парасковья Васильевна, урбаанньыт Анастасия Константиновна Сергеева — араас эйгэҕэ үлэлии-хамсыы сылдьар, холобур оҥостор  ийэлэрбит истиҥ сүбэлэрин бэлэх ууннулар. И.М. Павлов Чурапчы орто оскуолатын, С.А. Новгородов аатынан Чурапчы орто оскуолатын, С.К. Макаров аатынан Чурапчы гимназиятын, Д.П. Коркин аатынан Чурапчытааҕы республиканскай спортивнай олимпийскай эрэллэри бэлэмниир орто интернат-оскуолатын үрдүкү кылаас кыргыттара Ийэлэри болҕойон иһиттилэр, ыйытыы биэрэн сөптөөх хоруйдарын ыллылар. Оҕоҕо, ийэҕэ, дьиэ кэргэҥҥэ аналлаах “Кинигэ-үтүө сүбэһит” кинигэ быыстапканы библиотекарьдар С.К.Флегонтова, М.Н.Захарова билиһиннэрдилэр.