Ыам ыйын 20 күнүгэр Саха Өрөспүүбүлүкэтигэр Ийэ уонна Чурапчы улууһугар Ийэ Сир сылларыгар анаммыт Аан  дойдутааҕы  Дьиэ кэргэн күнүн чэрчитинэн  үтүө үгэскэ кубулуйбут «Сибэкки бырааһынньыга» атыы эргиэн-дьаарбаҥката ыытылынна. Тэрийээччилэр Чурапчы улууһун дьаһалтатын  социальнай коммуникацияҕа салаата уонна Чурапчытааҕы   киин библиотеката буолаллар. Бу бырааһынньыгы аан бастаан 1997 сыллаахха Чурапчытааҕы киин библиотека тэрийэн ыыппыта. Ол кэмтэн ыла бырааһынньык кэҥээн, тэнийэн билигин “Дьиэ кэргэн экэниэмикэтин сайыннарыы” диэн девиһинэн улуус дьоно-сэргэтэ сылын аайы көхтөөхтүк кыттар, кэтэһэр, сөбүлүүр бырааһынньыктара буолар. Сылын аайы дьаарбаҥкаҕа улуус араас нэһилиэктэриттэн  биирдиилээн оҕуруотчуттар, бааһынай хаһаайыстыбалар, агрооскуолалар кытталлар.

  Быйыл даҕаны былыттаах халлаан диэбэккэ  атыы-тутуу  хамаҕатык барда. Дьон сэргэ сайын устата бэйэ оҕуруотугар үүннэрэргэ оҕуруот аһын арассаадатын,  талах мастары, сибэкки  арааһын  атыылаһан үөрдүлэр-көттүлэр. Атыы-тутуу түмүгэр быйылгы дьаарбаҥкаҕа кыттыбыт оҕуруотчуттар анал ааттарынан  уонна бириистэринэн  наҕараадаланнылар.

  Ол курдук, анал ааттар «Дэлэй рассада — өлгөм үүнүү» Розалия Сухариноваҕа (Чурапчы), «Сибэкки эгэлгэтэ – эйгэбит симэҕэ» Светлана Егороваҕа (Чурапчы), «Кэскиллээҕи салайсан, быйаҥы уһансан» Төлөйдөөҕү агрооскуола кэлэктиибигэр, «Сэдэх үүнээйи хаһаайына» Одьулуун орто оскуола кэлэктиибигэр уонна «Быйаҥы  дэлэтэр  сайдам  ыал» диэн Дария Жиркова,  Прасковья Борисова бириэмийэлэрэ Екатерина Софронова дьиэ кэргэнигэр туттарылыннылар.

 Тэрээһиҥҥэ быйыл улуус баһылыга Степан Саргыдаев 50 тыһ. сууммалаах сертификаттарын эдэр ийэлэргэ улуус баһылыгын социальнай боппуруостарга солбуйааччы Мария Кронникова туттарда.  Ону таһынан быйылгы тэрээһиҥҥэ солун күрэх Ньукуолун куһун  үргээһин күрэхтэһиитэ буолла. Манна барыта 15  ыал ийэлэрэ, эбээлэрэ кытыннылар. 10 мүнүүтэ иһигэр саамай түргэнник уонна ыраастык үргээһиҥҥэ кыайыылааҕынан Диана Охлопкова буолла. Кини «ВостокСтрой» ХЭТ генеральнай дириэктэрэ Афанасий Матвеев туруорбут иистэнэр  массыынатынан наҕараадаланна. Кэлбит ыалдьыттар араас интириэһинэй күрэххэ кыттан, оҕуруоту үүннэриигэ, көрүүгэ-харайыыга анаммыт  кинигэ быыстапкатын көрөн, сэргээн наадыйар арассаадаларын ылан  үөрэн-көтөн астынан тарҕастылар.