Сэтинньи 25 күнүгэр Оҕо библиотекатыгар доруобуйаларынан хааччахтаах оҕолорго саха народнай суруйааччыта, бэйиэт Семен Данилов төрөөбүтэ 105 сылыгар аналлаах “Сана саҕахтар” диэн суруйааччы айымньыларынан оҥоһук күрэҕэ уонна республикаҕа Ийэ сылын чэрчитинэн  “Талааны арыйар кытыл” диэн тэрээһин бэрт сэргэхтик буолла. Тэрээһиҥҥэ дьиэҕэ иитэр-үөрэтэр киин үөрэнээччилэрэ, Семен Новгородов уонна Иван Павлов аатынан Чурапчы орто оскуолаларын, “Кыталык” уһуйаан иитиллээччилэрэ оҥоһук күрэҕэр кыттыыны ыллылар. Семен Данилов хоһооннорун ааҕан, ис сүрэхтэриттэн уруһуйдары, оҥоһуктары кыһаллан оҥорон аҕалбыттара кэрэхсэбиллээх. Дьүүллүүр сүбэҕэ улуустааҕы “Үөрүү” оҕо дьоҕурун сайыннарар киин иһинэн үлэлиир “Иэйии” куруһуок салайааччыта Альбина Дьячковская уонна Кииннэммит библиотечнай ситим Оҕону кытта үлэлиир отдел сүрүн бибилиотиэкэрэ Ольга Эверстова үлэлээтилэр. Күрэх түмүгүнэн бастыҥ үлэлээх оҕолорунан: Сахаян Сивцев, Карина Афанасьева, Аделина Макарова, Миша Дьячковскай, Нарыйа Никитина, Арина Степанова, Женя Павлов, Алена Павлова, Эрэл Родионов, Ким Обутов бэлиэтэннилэр, дьупулуомнары, кинигэ бэлэхтэри туттулар. Саамай долгутуулаах, күүтүүлээх түһүмэҕинэн оҕолор талааннарын, дьоҕурдарын, сатабылларын көрдөрүүлэрэ буолла. Манна Алена Павлова  хомуска оонньоон дьүрүһүттэ, Карина Афанасьева, Никитина Нарыйа, Күннэй Кычкина ылбаҕай ырыаларына  истээччилэр сүрэхтэрин долгуттулар, Стасик Оконешников хомоҕой хоһоон ааҕан иһитиннэрдэ, Рая Ильинова  тэтимнээх муусукаҕа үнкүүлээн көрдөрдө, Женя Павлов дьиктилээх фокус көрдөрөн барыбыт интэриэһин тарта, сөхтөрдө, Эрэл Родионов, Ангелина Елисеева, Юлия Кривошапкин уруһуйдуур талааннарын көрдөрдүлэр. Оҕолор бары даҕаны араас дьоҕурдаах, талааннаах буолалларын бигэргэттилэр, улаханнык сэргэхситтилэр. Хас биирдиилэригэр анал аат инэрилиннэ уонна минньигэс бэлэхтэр туттарылыннылар. Минньигэс бэлэхтэрбит спонсордарыгар кырачаан ааҕааччыбытыгар Арчылаан Осиповка ийэтигэр Александра Константиновнаҕа, “Барыс” маҕаһыынҥа барҕа махталбытын тириэрдэбит.