Биһиги өбүгэлэрбит тымныы кыһын кэнниттэн күөххэ үктэнии саҕана сүөһүлэрин-астарын илдьэ кыстыктарыттан сайылыкка көһөн тахсаллара. Бу кэми саҥа дьылы көрсөр күннэринэн ааҕаллара. Былыр былыргыттан саха дьоно тымныы кыһыны туораан самаан сайыны көрсө сайылыкка көһөллөрүгэр арыылаах алаадьы буһараллара уонна дьон-сэргэ этэҥҥэ сылдьарыгар, сүөһү-ас этэҥҥэ турарыгар, уйгуну-быйаҥы биэрэрин туһугар сири-дойдуну аһаталлара, айыылартан көрдөһөллөрө. Өбүгэлэртэн кэлбит үтүө үгэспитин сөргүтэр, утумнуур уонна тыа үлэһит дьонун өрө тутарга туһуланан 2018 сыллаахтан Ил Дархан Айсен Николаев ыам ыйын 22 күнүн сайылык күнүнэн биллэрбитэ.

Бу күҥҥэ анаан улуустааҕы киин библиотека ааҕар саалатыгар «Сайылык күнэ» диэн бырааһынньык кырачаан оҕолору түмтэ. С.А. Новгородов аатынан Чурапчы орто оскуолатын 2 – кылааһын үөрэнээччилэрэ (кыл сал. Хомподоева Л.П.) кэлэн ыалдьыттаатылар. Тэрээһин саха сиэринэн кырачаан ыалдьыттары алгыстааһынтан, ыраастаһынтан саҕаланна.

Салҕыы библиотекарь Захарова Матрена Николаевна оҕолорго сайылыкка көһүү туһунан, кини суолтатын, хайдах сайылыкка көһөллөрүн, туох сиэри-туому тутуһалларын, сайылык олоҕун, үлэтин саас сааһынан быһааран кэпсээбитин оҕолор сурдээҕин интириэһиргээн иһиттиллэр. Кырачаан ыалдьыттар бу күн сахалар саамай суолталыыр күндү астарын арыылаах алаадьыны, миньигэс саламааты амсайдылар.

Сахалар түмсэ түстэхтэринэ, айылҕаҕа, сибиэһэй салгыҥҥа илии атах оонньуур, күрэхтэһэр үтүө үгэстээхтэр. Ол сиэринэн бу күн оҕолор сахалыы оонньуу арааһын оонньоотулар. Ат сүүрдүүтэ, баттах өрүүтэ, сыалы таба быраҕыы, «ынах» ыаһына, салама баайыыта күрэхтэр ыытылыннылар. Сиэри-туому билиигэ тургутук боппуруостарыгар эппиэттээтилэр. «Сайылык күнэ» бырааһынньыкка оҕолор сайыны көрсүү суолтатын, сайылыкка көһүү диэн тугун билэн, саха маанылаах аһын амсайан, дуоһуйа оонньоон-көрүлээн элбэҕи билэн тарҕастылар.

«