Саха Өрөспүүбүлүкэтин  күнүнэн  тапталлаах Сахабыт  сирин  туһунан  Чурапчы  улууһун  суруйааччыларын уонна  олохтоох  ааптардарын   хоһооннорун  ааҕыҥ, сэргээҥ! 

ҮЙЭЛЭРГЭ ҮРДҮҮ ТУРДУН!Уруу-хаан доҕордуу омуктарУуһаабыт көмүс биһиктэрэУлуу Россия сорҕото буоларУрааҥхай сахалар сирдэрэ –Түҥ былыртан төрүт тардарХомурахтаах хоту дойдуҮүнэр-сайдар үтүө аатаҮйэлэргэ үрдүү турдун! Хомус хоҥкунуу дьүрүһүйэнХоһуйар эйэни, үлэни,Ититэр, ириэрэр, чэлгитэн,

Иллээх дьон тыыннара бу сири.

Түҥ былыртан төрүт тардар

Хомурахтаах хоту дойду

Үүнэр-сайдар үтүө аата

Үйэлэргэ үрдүү  турдун!

Кырса кыыл кыраһа кылаана,

Алмаас таас  арылы сыдьаайа,

Айылҕа баай-талым далбара

Анаммыт мааныылаах кыраайа –

Түҥ былыртан төрүт тардар

Хомурахтаах хоту дойду

Үүнэр-сайдар үтүө аата

Үйэлэргэ үрдүү турдун!

ТУПСА ТУР, ҮҮН-САЙЫН!

Улуукан Россия уруу-хаан сорҕото,

Урааҥхай саха омук төрүт-уус дойдута

Үс үөстээх Өлүөнэ киэҥ-куйаар хочото

Үлэ, дьол, ил-эйэ соргулаах  туоната.

Туругур көҥүл, тэҥ Сахабыт кыраайа,

Алгыстаах аартыгы арыйа, тэлэйэ!

Тупса тур, үүн-үрдээ, киэркэйэ, барҕара,

Аар-саарга аатыра, үйэттэн-үйэҕэ!

Хотугу муус байҕал дьыбардаах кытылын

Хорсун дьон сүрэҕин сылааһа ириэрдэ,

Тутабыт, айабыт самныбат саргытын

Доҕордуу  норуоттар чэлгитэ-чэчирдэ.

Туругур көҥүл, тэҥ Сахабыт кыраайа,

Алгыстаах аартыгы арыйа, тэлэйэ!

Тупса тур, үүн-үрдээ, киэркэйэ, барҕара,

Аар-саарга аатыра, үйэттэн-үйэҕэ!

Айылҕа баай-талым далбарын анаабыт

Алыптаах олоҥхо дьиэрэйэр дуолугар –

Эйиэхэ этиллэр иһирэх тапталбыт,

Эн күнүҥ күөрэйэ чаҕылла сыдьаайар 

Роман Данилов  “ Ыллыым икки тылынан»          

САХАМ СИРЭ

Ыра санаа ыран тиийэр

Ыраах сиргэ да түгэнним,

Атын дойду абылаҥнаах

Аартыктарын да арҕарыым,

Миигин кытта

Мин сүрэхпэр

Өрүү бааргын,

Сахам сирэ!

Муҥ муоратын муна-тэҥэ

Муннубунан тыырар кэммэр,

Санаа баттаан санньы түһэн,

Самнар, намтыыр да түгэммэр

Миигин кытта

Мин сүрэхпэр

Өрүү бааргын,

Сахам сирэ!

Орто дойду дьолун булан,

Оҕо курдук үөрэр күммэр,

Үөрүү үрдүк чыпчаалыгар

Өрөгөйдүүр да түгэммэр

Миигин кытта

Мин сүрэхпэр

Өрүү бааргын,

Сахам сирэ!

Алааспыттан арахпакка,

Аралдьыйан ырааппакка,

Үөрбэккэ да санньыйбакка,

Үөл-дьүөл сылдьар да түгэммэр

Миигин кытта

Мин сүрэхпэр

Өрүү бааргын,

Сахам сирэ!

Хаһан эрэ мантан баран,

Халлааҥҥа дуу, ханна дуу,

Орто дойдуттан тэйэн,

Ол дойдуга аттанарбар

Миигин кытта

Мин сүрэхпэр

Өрүү бааргын,

Сахам сирэ!

  Василий Петров-Айыл  

“Үтүөкэн бу орто дойдуга»                                                    

ҮЛЭ ҮӨРҮҮТЭ

Саргылаах хотугу сиргэ

Сахалыы ырыабыт ньиргий,

Өрүс долгунун тыаһыныы,

Үлэ үөрүүтүн туһунан

Туундара тыйыс тыалыныы,

Туманы, хаары быыһынан.

Саргылаах хотугу сиргэ

Сахалыы ырыабыт ньиргий!

Ырыабыт, эн ылланаҕын,

Сүрэхтэргэ кыымы саҕан.

Эн өрөгөйдөөх ньиргиэриҥ

Тутуу тыаһыгар холбосто,

Күн көрүн, үлэ күргүөмүн

Тойук гынан доҕордосто.

Ырыабыт, эн ылланаҕын,

Сүрэхтэргэ кыымы саҕан.

Унаар Уола  “ Күннээх Лена ”                          

ОО, САХАМ СИРЭ!

 Оо, Сахам сирэ!

Хаардаах көнө сыһыыларыҥ,

Дьикти көбүөр алаастарыҥ,

Уһун тымныы кыһыннарыҥ,

Кылгас  самаан сайыннарыҥ

Миэхэ күндүлэр мэлдьитин! 

Оо, Сахам сирэ!

Нуучча улуу айанньыттарыҥ,

Маҥан аттаах манчаарыларыҥ,

Чаҕыл тыллаах Максимнарыҥ,

Поэт Ойуунускай курдуктарын

Миэхэ күндүлэр мэлдьитин!

Оо, Сахам сирэ!

Өлбүт хорсун буойуннарыҥ,

Тыылга хоһуун туйгуннарыҥ,

Ырыа-тойук чаҕааннарыҥ,

Чулуу-мургун спортсменнарыҥМиэхэ күндүлэр мэлдьитин!

Оо, Сахам сирэ!

Күлүм оонньуур алмаастарыҥ,

Кыһыл көмүс саппаастарыҥ,

Тимириҥ, быйаҥ тааһыҥ,

Сүлүүдэҥ, гааһыҥ, чохторуҥ

Миэхэ күндүлэр мэлдьитин!

Оо, Сахам сирэ!

Айар-тутар хардыыларыҥ,

Иллээх, доҕордуу дьонноруҥ,

Тэҥҥэ хаамсар ыччаттарыҥ,

Кырдьыбат ветераннарыҥ

 Миэхэ күндүлэр мэлдьитин!

Оо, Сахам сирэ!

Дохсуннаахай өрүстэриҥ,

Балыктардаах баай күөллэриҥ,

Лаглаҕаркаан хатыҥнарыҥ

Кыраһыабай кыргыттарыҥ

Миэхэ күндүлэр мэлдьитин!

Оо, Сахам сирэ…

Николай Седалищев   “Чурапчыттан төрүттээх буоламмын»                               

МИН ДОЙДУМ   

Мин дойдум сирэм күөх хонуулаах

Айгыстар аар силик алаастаах,

Киҥкиниир киэҥ ыраас халлааннаах

Күлүмнэс чаҕылхай күн уоттаах.

Мин дойдум халыҥ сис тыалардаах,

Үрүйэ харыйа быыстардаах,

Суугунуур хатыҥ мас чараҥнаах,

Долгуна мэндээрэр күөллэрдээх.

Мин дойдум саймаархай салгыннаах,

Сипсийэр мэник тыал сиккиэрдээх,

Ый устар уу нуурал  киэһэлээх,

Түүн үөһэ дьиримниир сулустаах.

Мин дойдум эйэҕэс-сайаҕас,

Үтүөкэн үлэһит дьоннордоох,

Санаабын кынаттыыр сарыаллаах,

Сүргэбин көтөҕөр  көстүүлээх. 

Борис Горохов-Бээди Уола   «Тапталбын сурукка тиспитим»                                          

СОРГУЛААХ  СУОЛБУТУН  СОЛУОҔУҤ!

Түҥ үгэспит,

Төрүт сиэрбит

Силиктэрин

Ситэрбэхтээн,

Ийэ тылбыт,

Итэҕэлбит

Илбистэрин

Иҥэринэн,

Өбүгэбит

Өрөгөйдөөх

Өркөн өйүн

Өрө тутан,

Туора омук

Тутулларын,

Тургутардыы

Торумнарын

Толлубакка

Тобуламмыт,

Туруулаһан,

Тыын харбаһан

Туораан иһиэх

Туорайдарын!

Сандал  саҥнаах

Сарсыҥҥылаах,

Өһүк сиэрдээх,

Өйүүҥҥүлээх,

Эрэл иилээх

Эһиилгилээх,

Кэрэ кэҥиир

Кэнчээриилээх,

Ыра  туолар

Ыччаттардаах,

Көмүс күөннээх

Көмүскэллээх,

Харыс таастаах

Харысхаллаах

Саргылаах сарсыннаах

Сахалар буолуоҕуҥ,

Соргулаах соруктаах

Суолбутун солуоҕуҥ!

Дмитрий Федоров — Оһуохай Уола  «Иэй-куой, Ийэ Тылым!»