Бу күннэргэ Чурапчы улууһугар СР култууратын, искусствотын уонна литературатын күннэрэ ыытылла тураллар.  Муус устар 3 күнүгэр улуустааҕы киин библиотека   ааҕар саалатыгар «Чолбон» сурунаал редакцията  Чурапчы улууһун олохтоохторугар сүгүрүйэр чулуу суруйааччыбыт, саха народнай суруйааччыта, биир дойдулаахпыт В. С. Яковлев — Далан олоҕун уонна айар үлэтигэр  анаммыт өй күрэҕин ыыттылар. Оонньуу саҕаланыытыгар «Чолбон » сурунаал бас эрэдээктэрэ Гаврил Андросов тэрээһин  кыттыылаахтарын эҕэрдэлээтэ. Өй күрэҕин «Чолбон» редакция үлэһитэ Туйаара Степановна Павлова ыытта, дьүүллүүр сүбэҕэ  сурунаал бас эрэдээктэрэ Г. Г. Андросов уонна бас эрэдээктэри  солбуйааччы Д. Н. Макеев үлэлээтилэр. Кыттааччылар улуус нэһилиэктэриттэн  араас идэлээх дьон   4 түү киһилээх  5 хамаанда  тэринэн кэлэн кыттыыны ыллылар. Оонньуу үс түһүмэҕинэн ыытылынна, бастакы түһүмэххэ суруйааччы олоҕуттан  боппуруостар, 2, 3 түһүмэхтэргэ айымньыларыттан боппуруостар киирбиттэр. Кыттааччылар бары да суруйааччы туһунан олус үчүгэй бэлэмнээхтэрин, билиилээхтэрин көрдөрдулэр. Тыҥааһыннаах киирсии түмүгэр 1 кыайыылаах үрдүк аатын  Алазар, Бахсы, Мугудай, Төлөй холбоһуктаах хамаандата «Сис» ылла, 2 миэстэни Чурапчы сэлиэнньэтиттэн   «Тоҕус томтор» хамаанда, 3 миэстэни  Хадаар, Дириҥ, Хайахсыт, Чакыр холбоһуктаах хамаандата «Эриликтэр»  ыллылар. Оонньуу кыттыылааҕа Кытаанахтан биир дойдулааҕа Смирников Н.Ф. Далан туһунан сүрдээх интириэһинэй ахтыы оҥорон , суруйааччы бэйэтэ суруйбут суругун илдьэ кэлбитин көрдөрдө. Салҕыы өй күрэҕин кыттыылаахтарын  норуодунай суруйааччы  Николай Лугинов эҕэрдэлээтэ. Кыайыылаахтарга  сурунаал  редакцията грамоталары   Далан «Дьылҕам миэнэ» кинигэтин, «Чолбон» сурунааллары бэлэх туттартаата. Биир дойдулаахпыт, норуодунай суруйааччы В. С. Яковлев — Далан 95 сылыгар анаммыт өй күрэҕэ бэрт интириэһинэйдик, сытыытык ааста. Киэн туттар, сүгүрүйэр суруйааччыбыт туһунан элбэҕи, саҥаны билэн тэрээһин  кыттыылаахтара астынан тарҕастылар.