Алтынньы 18 күнүгэр Чурапчытааҕы  «Айылгы» норуот  айымньытын дьиэтигэр улуустааҕы киин библиотека тэрийиитинэн  кинигэ сүрэхтэниитин дьоро күнэ  буолла.  Чурапчы нэһилиэгин олохтооҕо, СӨ Суруйааччыларын сойууһун чилиэнэ, «Чурапчы» литературнай  түмсүү салайааччыта, улахан ыал күн- күбэй ийэтэ Римма Иннокентьевна Корякина – Хотууна «Көмүс көһүйэ остуоруйалара» диэн кинигэтэ сүрэхтэннэ. Тэрээһиҥҥэ кыттыыны ылла, санааларын үллэстэн, умсугутар сэһэнинэн мустубут дьону сэргэхситтэ СӨ Суруйааччыларын сойууһун бэрэссэдээтэлэ, саха норуодунай поэта Иван Васильевич Мигалкин.

Чурапчытааҕы библиотечнай ситим директора Вера Аполлоновна Платонова   ааптар  айар үлэтин сырдатта уонна  оҕолорго анаммыт сүрдээх үчүгэй  саҥа остуоруйа кинигэни киэҥник, толору арыйан билиһиннэрдэ.

 Билиҥҥи кыра саастаах оҕолорго анаммыт сахалыы тылынан айымньы кэмчи кэмигэр бу  кинигэ  үтүө бэлэх  буолла. Кинигэҕэ  араас тыа кыыллара ойууланан кыра киһини сиэргэ-майгыга, үтүөҕэ — кэрэҕэ,  үөрэтэр- иитэр  сырдык тыыннаахтар.

Остуоруйа ис хоһоонун арыйар саха  кыраҕы, бэргэн этиилэрэ кинигэ колонтитула буолбуттара  сонун ис хоһооннууллар. Тэрээһиҥҥэ норуодунай поэт И.В. Мигалкин, Чурапчы улууһа  оройуона МТ баһылыгын социальнай боппуруостарга солбуйааччыта М.Ф. Кронникова, суруйааччы П.П.Федоров ааптары эҕэрдэлээн, үтүө – баҕа санааларын эттилэр.

 Тэрээһин кыттыылаахтара  суруйааччы Р.И.Корякина — Хотууна  уонна норуодунай поэт И.В.Мигалкин айар үлэлэрин, айымньыларын туһунан кинигэ быыстапкатыттан  билистилэр. Сүрэхтээһиҥҥэ айар — суруйар  биир дойдулаахтарбыт, учууталлар, уһуйааччылар   бэйэлэрин санааларын үллэһиннилэр, кинигэни ырыттылар. Оҕолорго  анаммыт айымньыны үрдүктүк сыаналаатылар,  кэнчээри ыччаты  иитиигэ – үөрэтиигэ дьоһун суолталаах  буоларын бэлиэтээтилэр. Дьоро күнү Римма Иннокентьевна талааннаах ырыаһыт оҕолоро, аймаҕа Валерий Корякин ырыанан доҕуһуоллаан киэркэтэн биэрдилэр.