Биир дойдулаахпыт, историческай наука доктора, профессор, Российскай Федерация Саха Республикатын наукаларын үтүөлээх деятелэ, А.Е.Кулаковскай аатынан СР Государственнай бириэмийэтин бастакы лауреата Георгий Прокопьевич Башарин төрөөбүтэ 110 сылын көрсө «Улуу биир дойдулаахпыт, үтүө холобуругар ыччаппытын уһуйуоҕун» — диэн улуус иһинэн төгүрүк остуол тула кэпсэтии улуустааҕы киин библиотекаҕа ыытылынна. Төгүрүк остуолу библиотекарь М.Н. Захарова иилээн-саҕалаан ыытта.

    Г.П. Башарин аатынан Сылан орто оскуолатын агрохайысхаҕа иитэр үлэтин директорын солбуйааччыта Л.С. Сивцева оскуола иитэр-үөрэтэр, чинчийэр үлэлэрин сырдатан уонна үөрэнээччилэр Макаров Тимур 2 кылаас «В горе познается истина», Нестерева Аня 5 кылаас «Меня оценят в 21 веке», Дьячковский Вася 8 кылаас «Интерактивный путеводитель по местам профессора Г.П. Башарина» диэн дакылааттарынан ааҕан дьон интэриэһин тартылар.

   Л.М. Григорьева, В.Д. Пинигина, В.Д. Попова, С.И. Никитин, А.М. Слепцов, М.Ф. Кронникова, М.В. Дьячковскай бэйэлэрин ахтыы кэпсээннэринэн, солун этиилэринэн кэпсэтиини дирин ис хоһоонноон биэрдилэр.

    Ыалдьыттар «Наука эйгэтигэр» диэн кинигэ быыстапкатын сэргээн, кэрэхсээн көрдүлэр. Аянитова Е.А., Сивцева Л.С. “Башаринские чтения” диэн киэҥ ис хоһоонноох кинигэни киин библиотекаҕа бэлэхтээтилэр. Төгүрүк остуол кыттааччылара элбэҕи, саҥаны билэн астынан тарҕастылар.