Кулун тутар 22 күнүгэр поэт, Россия суруйааччыларын сойууһун чилиэнэ, Саха Өрөспүүбүлүкэтин култууратын туйгуна, мелодист, үлэ бэтэрээнэ Петров Василий Егорович – Айыл төрөөбүтэ 75 сылыгар анаан «Поэт олорбута, айбыта» диэн литературнай музыкальнай биэчэр буолла.

«Утум» норуот айымньытын дьиэтин иһинэн үлэлиир «Тыыннаах тыл» түмсүү поэт хоһооннорунан олоҕун сырдатан аахтылар. 

Библиотека үлэһиттэрэ «Сэттэ кэрэ кэрдиис кэм» диэн хоһоонунан композиция туруордулар.

Хоптоҕо нэһилиэгин ветераннарын түмсүүтэ уран тарбахтаахтара  кыбытык тигиинэн оҕолорго аналлаах хоһооннорун панно оҥорон тикпиттэрэ айымньыларын солун тыыннаатылар.

Поэт бэйэтэ оҥорбут уонна тутта сылдьыбыт малларын быыстапката тэриллэн, дьон болҕомтотун тарта.

«Айылгылаах Айыл поэт» диэн кинигэ быыстапката турда.

Аймахтара кэлэн кытыннылар: Хайахсыттан эдьиийэ Петрова Мария Николаевна, Россия үөрэҕириитин туйгуна, Ср үөрэҕириитин бочуоттаах бэтэрээнэ уонна аҕатынан балта СР үөрэҕириитин туйгуна, үөрэх эйгэтин Бочуоттаах үлэһитэ, Хайахсыт орто оскуолатын саха тылын учуутала Петрова Евдокия Иннокентьевна, Дириҥтэн бииргэ төрөөбүт быраата Хоптоҕо нэһилиэгин норуотун маастара Петров Владимир Егорович, Екатерина Михайловна Петрова СР культууратын туйгуна, сцена, үлэ культуура бэтэрээнэ.

Аймаҕа мелодист, баянист, ырыа толорооччу Александр Иванов байааҥҥа доҕуһуоллаан ыллаан дьон сүргэтин көтөхтө.

«Сыккыс» интэринээт оскуола ансаамбыла «Чурапчы сир кэрэтэ» диэн ырыаны ыллаатылар.

  Бэйэлэрин истиҥ санааларын үллэһиннилэр: Вера Аполлоновна — улуустааҕы кииннэммит библиотечнай ситим директора, СР культууратын үтүөлээх үлэһитэ, Павел Петрович Федоров — Сомоҕо СР культууратын үтүөлээх үлэһитэ Россия суруйааччыларын уонна суруналыыстарын чилиэнэ, биллиилээх прозаик, суруналыыс, Мария Андреевна Герасимова — Сэҥээрэ — РСФСР уонна СР культуратын үтүөлээх үлэһитэ, ССРС культуратын туйгуна, Россия суруйааччыларын сойууһун чилиэнэ, Семен Иванович Никитин — СР мунньаҕын Ил Түмэн норуодунай депутата уо.д.а.  Элбэх ырыа, хоһоон аргыстаах үтүө көрсүһүү үрдүк таһымнаахтык ааста. Тэрээһини ыыттылар: «Утум» норуот айымньытын дьиэтэ, Хоптоҕо нэһилиэгин «Үрдэл» норуот айымньытын киинэ уонна улуустааҕы киин библиотека.