«Гражданскай сэрии тиэмэтэ уус-уран литератураҕа» диэн оскуола оҕолоругар патриотическай иитиигэ аналлаах уруоктар ыытылыннылар. Уруогу ыытта Захарова Матрена Николаевна.   Хайа да норуот  үүнэригэр-сайдарыгар уус-уран литература бигэ тирэх буолар. Эдэр ыччат өй-санаа өттүнэн иитиллэригэр ураты суолталаах.  Уруокка Саха сирин историятын биир лоскуй кэмин, гражданскай сэрии туһунан кылгас билиһиннэрииттэн, бу темаҕа ханнык кинигэлэри ааҕыахха сөбүн ыйыыттан саҕаланар. Онтон, чуолаан, суруйааччы Семен Степанович Яковлев — Эрилик Эристиин “Маарыкчаан ыччаттара” диэн романын тула кэпсэтии барда. Бу кинигэ быйыл бэчээттэнэн тахсыбыта 80 үбүлүөйдээх сыла. Романы суруйаары суруйааччы бастаан бэлэмнэнэн араас кинигэлэртэн гражданскай сэрии сылларын историятын хаттаан үөрэтэр, Боотурускай улуус революционнай олоҕо историческай очерканы туһанар, ыалдьан икки хараҕынан көрбөт буола  сытан, Василий Саввин диэн оҕоҕо этэн суруйтарбыта. Бэйэтэ гражданскай сэрии кыттыылааҕа, кыһыл бартыһаан этэ, онон тус бэйэтин олоҕуттан, гражданскай сэрии сылларыгар Чурапчы сиригэр буолуталаабыт түбэлтэлэри уустаан-ураннаан көрдөрбүтэ. Роман сүүстэн тахса араас образтардаах, персонажтардаах. Сүрүн геройдарын прототиптарынан дьиҥнээх баар буола сылдьыбыт дьоннор буолаллар, солуна диэн  эдэр ыччат сайдыытын темата арыллар.   “Маарыкчаан ыччаттара” роман киэҥ биһирэбили ылбыта, классическай айымньылар ахсааннарыгар киирбитэ. Билигин да ааҕааччылар биир тыынынан ааҕар, сонурҕуур айымньылара буолар. Кинигэ улуустааҕы киин библиотекаҕа баар, уларсан ааҕаргытыгар сүбэлиибит.