“Сибэкки сипсиэрэ»  Гаврильева Е.С. – Сибэкки Дуунньа сибэккини үүннэрээччилэргэ, оҕуруотчуттарга  туҺалаах сүбэлэрдээх кинигэтэ  Оҕурсу үүннэриигэ сүбэлэр Бары бэркэ сөбүлүүр оҕурсубут сайын хайдах үүнэрэ, төһө аһы биэрэрэ бастакыттан хайдах дьаһайан олордортон тутулуктаах.  Оҕурсуну хас нэдиэлэ ахсын эбии аһатыллар, аһатыах иннинэ хайаан да ууну дэлэччи кутуллар. Аһын  наһаа улаатыннарбакка быһан иһиллэр, улааппыт оҕурсу саҥа үүнээччилэр астарын былдьаан сиир. Уоҕурдуунан аһатабын, оччоҕо ото дэлби хойдор.Бастаан ото элбиирин наадатыгар ынах сааҕын ууга суурайан киллэрэр ордук. Сайын ортотуттан атын эбилигинэн аһатыллар, тоҕо диэтэххэ, күүһэ аһыгар буолбакка, сэбирдэҕэр баран хаалыа.Эбии аһатыы       Биэдэрэлээх ууга 30 хааппыла дьуоту, 1 лиитирэ үүтү уонна кыһыллыбыт хаһаайыстыбаннай мыыланы булкуйан  суурадаһын оҥорон кутуллар.       Биир лиитэрэ ууга бухааҥка килиэби илдьиритэн, 10 таммах дьуоту кутан хонноруллар, сарсыныгар биир биэдэрэ ууга суурайан, ыйга икки төгүл ыстардахха, оҕурсу да, биэрэс  да күһүҥҥүгэ диэри күп-күөх чэлгийэн туруохтара. Сорох  ук астаммакка сибэккинэн көрөн турар идэлээх. Оччотугар үүттээх, саахардаах уоҕурдуунан аһатыллар: биэдэрэлээх ууга икки лиитэрэ “күөх үүтү», 1,5 ыстакаан саахары суурайан кутуллар. Аҕыйах хонон баран ас бөҕө  бытыгырыа. Аһын кутарыгар биэстии хоно-хоно, 0,5 лиитэрэ бурданы кутар көмөлөөх.Сиппэтэх сиэмэ үксүгэр кураанах сибэккилэнэр. Боппуруоһу икки ньыманан быһаарыллар.

Биэс-алта сэбирдэх кэнниттэн угун төбөтүн, быһан кэбиһиллэр. Оччотугар ойоҕос сэбирдэхтэр үүнэллэр, олорго тыһы сибэккилэр тахсан ас куталлар.Куурда –хатара түһэн баран, ууну дэлэччи соҕус кутан, лиитэрэ кэриҥэ борнай кислота суурадаһынынан (10 лиитэрэ ууга 1 чаайынай ньуосканы буккуйан) аһатан биэрдэххэ, стресс ылан, ас кутар сибэккилэр тахсаллар.

 Сэбирдэх  саһарда. Ол аата…Ити сырдык тиийбэтин кэпсиир. Оҕурсу тэпилииссэ иһигэр наһаа хойуу гына олордуллан, күн уота көрбөт буоллаҕына саһарар. Оччотугар сэбирдэхтэриттэн көҕүрэтиллэр.Иккиһинэн, уута аһары кутуллубут эбэтэр төттөрүтүн тиийбэт буоллаҕына эмиэ саһарар. Оҕурсуга ууну итиигэ күн аайы кутуллар, сөрүүн кэмҥэ күн өрүү-өрүү. Онуоха сэрэниллэр: бүтүн биэдэрэнэн ыстахха, үөһээҥҥи силистэрэ тахсан кэлиэхтэрэ, онтон сылтаан сэбирдэхтэрэ уонна ситэн эрэр астара хатыахтара, токуруһуохтара. Силиһэ үөһэнэн буолан, сөрүүн сайыҥҥа силистэрэ сытыйан, тоҥон эмиэ саһарааччы. Ол иһин сөрүүн уонна ардахтаах кэмҥэ ууну кэмчилээн кутар ордук. Тэллэй  ыарыы буллаҕына эмиэ саһарар, тирээпкэ курдук ньалбайан хаалар.    Ааптар   кинигэтигэр  күөх үүнээйилэри, сибэккини, оҕуруот аһын көрүү –истии уопсай ирдэбиллэрин, уратыларын, буортулаах ыарыылартан, үөнтэн көйүүртэн  сэрэтэр үлэни тэрийиини, эмтээһини итиэннэ тиэргэни хайдах тупсарар туһунан бэйэтин өр сыллаах  үөрүйэҕин  үллэстэр. Туһалаах кинигэни уларсыҥ, ааҕыҥ, тускутугар туһаныҥ!