Олунньу 14 күнүгэр киин библиотека «Алгыс» литературнай-музыкальнай салонугар  “Хоһооммун, дьылҕабын тэҥҥэ тутабын” диэн саха норуодунай бэйиэтэ, Саха сирин суруйааччыларын Сойууһун бэрэссэдээтэлэ Наталья Ивановна Харлампьеваны кытары истиҥ-иһирэх көрсүһүү буолла.Тэрээһиҥҥэ Наталья Ивановна поэзиятын сэҥээрээччилэр, улуус дьокутааттарын Сэбиэтин бэрэссэдээтэлэ Афанасий Захаров, РФ, СӨ култууратын үтүөлээх үлэһитэ Ольга Харайбатова, Аҕа дойду Улуу сэриитин кыттыылааҕа Гаврил Дмитриевич Ефимов кыыһа Дария Гуляева, саха тылын учууталлара, култуура үлэһиттэрэ, уопсастыбаннай түмсүүлэр чилиэннэрэ уо.д.а. кыттыыны ыллылар. Тэрээһини улуустааҕы кииннэммит бибилэтиэкэ ситимин дириэктэрэ Вера Платонова салайан ыытта. Мустубут дьоҥҥо Наталья Ивановна ситиһиилэрин, олоҕун, айар үлэтин билиһиннэрдэ. Саха норуодунай бэйиэтэ Наталья Харлампьева олоҕун сырдык, умнуллубат түгэннэриттэн истиҥник кэпсээтэ, маны тэҥэ айар, уопсастыбаннай үлэтин туһунан сырдатта. Н.И.Харлампьева бэйэтин хоһоонноруттан аахпыта көрсүһүү кыттыылаахтарын улахан сэҥээриитин ылла. Бибилэтиэкэҕэ дэҥҥэ көстөр интэриэһинэй кинигэлэрин — нуучча, тува, татаар, азербайджан тылынан тылбаастаммыт хоһооннорун хомуурунньуктарын, бэйэтэ хомуйан таһаартарбыт «Саха таптала» диэн Сэмэн Данилов туһунан уонна «Признание в любви» диэн саҥа тахсыбыт кинигэлэрин бэлэхтээтэ.   Көрсүһүүгэ кэлбит дьон интэриэһиргиир  боппуруостарыгар эппиэттэри ылан, улаханнык астыннылар, махтаннылар. Наталья Ивановна курдук, общество олоҕор дьайар күүстээх, айар талааннаах дьон кэлэн санааларын атастаһаллара, дьону духуобунай сайдыыга уһуйаллара улахан оруоллааҕын бэлиэтээн, маннык норуоту кытта суруйааччы көрсүһүүтэ, тыыннаах тылын иһитиннэриитэ олус наадалааҕынан, элбэхтэ буоларыгар баҕа санааларын биллэрдилэр.