Ыам ыйын 25 күнүгэр Е.А.Борисов аатынан киин библиотекаҕа СӨ доруобуйатын харыстабылын үтүөлээх үлэһитэ, РФ,СӨ доруобуйатын харыстабылын туйгуна, «Гражданскай килбиэн » бэлиэ хаһаайына,Чурапчы улууһун П.Н. Сокольников аатынан киин балыыһа клинико- диагностическай лабораториятын сэбиэдиссэйэ, кыраайы үөрэтээччи Любовь Михайловна Григорьева хомуйан таһаарбыт үс кинигэтин сүрэхтэниитэ үөрүүлээх быһыыга ыытылынна. Бу күн сайыҥҥы сылаас күн, күөрэйбит күммүт ыраас халлааҥҥа мичиҥнии оонньоон, уһун кыһынтан күөххэ үктэммит дьон сүргэбит көтөҕүллэн, саҥаны кэрэни билээри, истээри, күө-дьаа кэпсэтэн тэрээһин саҕаланарын кэтэһэ олордубут, истиэнэҕэ Любовь Михайловна төрүттэрин кэпсиир хаартыскалар ыйаммыттар, «Айар, суруйар, чинчийэр аартыгынан” диэн кинигэ быыстапкатыгар Любовь Михайловна хомуйан оҥорбут кинигэлэрэ, хаһыакка киирбит ыстатыйалара турбуттар. Эдэркээн кыргыттар арыылаах алаадьынан, саламаатынан кэлбит дьону айах тутан күндүлээтилэр. Үөрүүлээх тэрээһини иилээн саҕалаан киин библиотека ааҕааччыны кытта үлэлиир отдел сэбиэдиссэйэ Марфа Николаевна Кузьмина ыытта. Любовь Михайловна дьаныардаах сыралаах үлэтинэн, улууспутугар үлэлээн ааспыт дьону үйэтитиигэ бу уон сыл усталаах туората элбэх кинигэни таһааттаран үйэтитиигэ сүҥкэн үлэни үлэлээн кэлбитин сырдаппытын, бу быыстапкаҕа турар кинигэлэртэн, буруолуу сылдьар бүгүҥҥү сүрэхтэр кинигэлэртэн истэн көрөн сөхтүбүт, астынныбыт. Ол курдук «Тумус туттар киһибит Елизавета Попова», «Чурапчы миэдиктэрэ сэрии сылларыгар»,, «Слепцова Нина Ильинича — учуутал, номох буолбут пионер-баһаатай» кинигэлэри дьоҥҥо сэргэҕэ, кэлэр кэнчээри ыччакка, улуус историятын билиигэ- көрүүгэ анаан, дьон ахтыыларыттан, элбэх литератураны, архивтары хаһан көрдөөн хомуйан таһаартаабыт. Кинигэлэри Марфа Николаевна биирдии биирдии хас түһүмэхтэн турарын туох туһунан сурулларын киһиэхэ тиийимтиэ гынан ырытыы оҥордо. Кырдьык даҕаны сөҕүмэр үлэ ыытыллыбыт кинигэлэрин истэ-көрө олорон Любовь Михайловна бэйэтэ тус үлэлээх, дьиэлээх уоттаах киһи хантан бириэмэ булан аттаран бу үлүгэрдээх элбэх дьонтон ахтыы, хаартыска хомуйан, архивтары кэрийэн булан талан оҥортообутун көрөн сөхтүбүт. Елизавета Егоровна Попова биһиги улууска лаборатория атаҕар туруутугар сыралаһан үлэлээбит улахан өҥөлөөҕүн кинини кытта алтыһан үлэлээбит дьоно- сэргэтэ бэрт истиҥник сырдаппыттарын, хаартыскалар кэрэһэлииллэрин бу кинигэ-альбомҥа көрөҕүн.СӨ доруобуйатын харыстабылын, культура туйгуна, ССРС бочуоттаах донора Елизавета Егоровна киһи быһыытынан сүрдээх элэккэй, хас биирдии анализ туттара кэлбит киһини кытта төрүккүттэн билсэр киһитин курдук кэпсэтэрэ. Елизавета Егоровна аҥардас үлэнэн эрэ муҥурдаммат этэ, кини Чурапчытааҕы П М.Решетников аатынан народнай театр биир биллэр көстөр артыыһа этэ, кини арыйбыт образтара билигин да дьон өйүгэр санаатыгар, ол кэрэ кэмнэр туоһулара буолан сүппэттик иҥмиттэр.Елизавета Егоровна үтүө суобаһынан, дьаныардаах үлэтинэн тэриллибит, атаҕар чиҥник турбут лабораторияҕа Любовь Михайловна быһаччы туруорсуутунан 2020 сыллаахха Елизавета Егоровна 80 сааһыгар бу лабораторияҕа кини аата иҥэриллибитэ. Кини чаҕылхай үлэтин- хамнаһын сурукка- бичиккэ киллэрэн 1973-1988 сылларга киин балыыһа кылаабынай бырааһынан үлэлээбит, тэрийэр методическай үлэҕэ үлэлээбит Афанасий Иннокентьевич Пермяков «Үс төгүл туйгун киһи этэ» «Саҥа олох” хаһыакка таһааттарбыт ыстатыйатыгар ааҕан улууспутугар үтүөкэн да дьон үлэлээн ааспыттарын сыаналыыгын. «Чурапчы медиктэрэ сэрии сылларыгар » кинигэҕэ Аҕа дойду Улуу сэриитигэр фроҥҥа, тыылга кыайыыны уһансыбыт,Чурапчы көһөрүллүүтүгэр сылдьыбыт биһиги оройуон дьонун- сэргэтин туһунан суруллубут. Бу кинигэ биэс түһүмэхтэн турар, манна кэпсэнэринэн сэрии ыар сылларыгар биһиги медиктэрбит хайдахтаах курдук үлэни үлэлээн кыайыыны аҕалсыбыттарын архивнай даннайдартан урукку кэмнэргэ суруллан хаалбыт суруктан-бичиктэн билэҕин. Үһүс кинигэ Пионерия 100 сылыгар аналлаах буолан, Любовь Михайловна урукку кэмнэргэ пионер вожатайдарынан үлэлээбиттэри ыҥыртаан таһааран бочуоттаах пионер кэккэтигэр ылан пионер кыыһар кыһыл хаалтыһын баайталаата. «Слепцова Нина Ильинична — учуутал, номох буолбут пионер вожатай» Любовь Михайловна эбээтин туһунан кинигэ, кини бу олоххо үтүөкэн олоҕу олорон ааспытын, бииргэ алтыһан үлэлээбит Тааттатын, Мэҥэ Хаҥалаһын дьонун сэргэтин ахтыытыттан билэҕин.Нуучча чулуу кыыһа биһиги сахабыт сирин таптаан манна олохсуйан оҕону иитиигэ элбэх кылаатын киллэрсибитин билигин да күндүтүк саныыр дьоно үйэтитэр араас дьаһаллары тэрийэллэрин Любовь Михайловна ыҥырыылаах ыалдьыт буолан бара сылдьан көрбүтүн истибитин астына дуоһуйа кэпсээтэ. Бу дьон гиэнэ чулуулара, киһи гиэнэ кэрэмэстэрэ үйэттэн үйэҕэ умнуллубаттыы кинигэҕэ тиһиллэн тахсыбыттарыгар биһиги Чурапчы дьоно- сэргэтэ Любовь Михайловнаҕа барҕа махталбытын тиэрдиэх тустаахпыт уонна кэнчээри ыччаппыт өйүгэр-сүрэҕэр иҥэрэригэр үлэни ыытыахтаахпыт. Хайдахтаах курдук үтүөкэн дьон үлэлээн кэлэн ааспыттарын, оройуоммут, улууспут историятын билэллэрин туһугар бу маннык кинигэлэри ааҕан үтүө дьонтон үөрэнэн, кинилэр эмиэ улууспут сайдыытыгар кылааттарын киллэрсэллэригэр бэлэмнээх буолан тахсалларыгар олук буолар кинигэлэр. Любовь Михайловнаны үтүө дьыаланы оҥорбутун, үйэтитиигэ сүдү кылаатын киллэрсибитин кэлбит дьон эҕэрдэлээн, махтанан тыл маанытын анаатылар. Бииргэ алтыспыт эдэр коллегата Александра Седалищева бэйэтин ылбаҕай ырыатын бэлэх уунна. Киин балыыһа кылаабынай бырааһа Николай Сергеевич Сивцев, урукку сылларга кылаабынай быраастаабыт Александр Иннокентьевич Коркин бииргэ алтыһан үлэлиир киһилэрин сырдатан тыл эттилэр, махтаннылар,наҕараадаларын туттардылар. А.А. Саввин аатынан история уонна этнография музейын директора Афанасий Афанасьевич Захаров Любовь Михайловналыын ханнык кэмҥэ хайдах алтыһан үлэлээбиттэрин «Мөккүөрдээх кэм туоһулара» кинигэҕэ, политическай деятель биһиги улуус киһитэ Иван Винокуров туһунан кинигэни таһаарбытыгар үлэлэспиттэрин кэпсээтэ. Киин библиотека директора Вера Аполлоновна Платонова Любовь Михайловна бу уонтан тахса кинигэлэрэ библиотекаҕа сүрэхтэммиттэрин, элбэх үчүгэй отзывтары ылбыттарын астына дуоһуйа сырдатта уонна нэһилиэк баһылыгын эҕэрдэ суругун туттарда. Любовь Михайловна С. Вахрин «Тайны якутских фамилий» кинигэни библиотекага бэлэх уунна. Дьэ сити курдук бу тэрээһиҥҥэ сылдьыбыт дьон бары да астынан Любовь Михайловнаҕа чөл доруобуйаны, өссө да үйэтитиигэ элбэх үлэни оҥороругар баҕа санаабытын тиэрдэн, Сэмэн Морфунов оһуохайынан бу дьоро истиҥ тэрээһини түмүктээтибит. “Чурапчы” литературнай холбоһук чилиэнэ Клара Кузьмина -Уус кыыһа
