2017 сылтан саҕалаан улуустааҕы култуура салаата уонна улуустааҕы киин библиотека кыттыһан Россия култууратын уонна ускуустубатын күнүгэр (кулун тутар 25 күнэ) анаан сылын аайы научнай-практическай конференцияны тэрийэн ыытар. НПК сыалынан Чурапчы улууһуттан төрүттээх култуура, ускуустуба диэйэтэллэрин айар үлэлэрин үөрэтии, дьоҥҥо тиэрдии, чинчийэр үлэҕэ көҕүлээһин буолар. Быйыл конференция саҕаланыан иннинэ «Үбүлүөйдээх суруйааччылар, культурологическай ааҕыылар : Россия култууратын уонна ускуустубатын үлэһиттэрин күннэригэр аналлаах научнай-практическай конференция матырыйааллара (Чурапчы, кулун тутар 21 к. 2017 с., кулун тутар 28 к. 2018 с., кулун тутар 25 к. 2019 с.)» диэн конференция кыайыылаахтарын дакылааттарын түмэн М.Н. Кузьмина, С.Н. Ючюгяева хомуйан оҥорбут кинигэлэрин билиһиннэрии буолла. Бэһис сылын ыытыллар научнай-практическай конференция быйыл үс хайысханан ыытылынна. Ол курдук, бастакы хайысха – Чурапчы улууһуттан төрүттээх култуура уонна ускуустуба диэйэтэллэрэ, иккис – САССР тэриллибитэ 100 сыла, үһүс хайысха – Култуура уонна ускуустуба эйгэтигэр көҥүл тиэмэ. Барыта 32 киһи кытынна, 33 дакылаат иһилиннэ. Дьүүллүүр сүбэ чилиэннэринэн: Платонова В.А., кииннэммит библиотечнай ситим директора, Попова В.Д., Е.А. Борисов архыып-библиотекатын сэбиэдиссэйэ, Борисова М.Е., Чурапчы улууһун култуураҕа салаатын уонна ускуустуба тэрилтэлэрин кытта үлэҕэ салаа сүрүннүүр специалиһа. Бастакы хайысха – «Чурапчы улууһун култууратын уонна ускуустубатын диэйэтэллэрэ». Бу хайысхаҕа бастакы миэстэни Борисова Калерия (Алаҕардааҕы «Ырыа» норуот айымньытын дьиэтэ) «Ф.Гоголев — өрөгөйдөөх мелодист»дакылаатынан, иккис миэстэни Петрова Татьяна (А.П. Гоголев аатынан оҕо ускуустубатын оскуолата) «Восприятие картин А.Мунхалова, через музыку якутских композиторов» дакылаатынан, үһүс миэстэни Егорова Татьяна (Мындаҕаайытааҕы модельнай библиотека) «Эргиччи талааннаах, киэҥ туттар киһибит Николай Иннокентьевич Протодъяконов». Иккис хайысха – «Саха АССР төрүттэммитэ 100 сыла». Бу хайысхаҕа бастакы миэстэни Аммосова Надежда (улуустааҕы киин библиотека) «Чаҕылхай национальнай лидер, Боотурускай улуус кулубата Е.Д.Николаев I» дакылаатынан, иккис миэстэни Ючюгяева Сахалена (улуустааҕы киин библиотека) «Ананий Кононович Андреев» дакылаатынан, үһүс миэстэни Герасимова Мария (Чурапчы улууһун култууратын управлениетын иһинэн фольклор салаата), «ВЯОНУ Чурапчыга кэлиитэ» дакылаатынан. Үһүс хайысха – «Култуура уонна искусство эйгэтигэр көҥүл тиэмэ». Бу хайысхаҕа бастакы миэстэни Ахматова Надежда («Утум»норуот айымньытын дьиэтэ) «Саха таҥаһын сайдыыта» дакылаатынан, иккис миэстэни Макаров Егор (Сыланнааҕы А. А. Сивцев аатынан норуот айымньытын дьиэтэ) «Ийэлэр ырыа тула» дакылаатынан, үһүс миэстэни Кузьмина Изабелла, Семенова Христина (Төлөйдөөҕү “I-тал“ саҥа көлүөнэ библиотеката), «Холобур оҥостор, киэҥ туттар ветераммыт Екатерина Семеновна Ксенофонтова».