Улуустааҕы киин библиотекаҕа Илларионова Венера Егоровна кэлэн икки саҥа таһааттарбыт кинигэлэрин, төрөөбүт төрүт тыл күнүн көрсө, бэлэх уунна. «Күн сирин үтүө киһи киэргэтэр» диэн кинигэҕэ СӨ судаарыстыбаннай деятеля, үтүөлээх юриһа, талааннаах поэт, тылбаасчыт, СӨ бастакы ыҥырыылаах Судаарыстыбаннай мунньаҕын (Ил Түмэн) Бэрэстэбиитэллэрин Палаататын бэрэссэдээтэлэ А.П.Илларионов туһунан аймах дьонун, үөлээннээхтэрин ахтыылара, ону таһынан Афанасий Петрович бэчээккэ тахсыбатах хоһоонноро, доҕотторугар, аймахтарыгар анаабыт эҕэрдэлэрэ, үлэтин, олоҕун кэпсиир библиографическай ыйынньык таҥыллан киирбиттэр. Иккис кинигэ «Күн аанньал ийэбит» диэн Венера Егоровна күн күбэй ийэтин, Эрилик Эристиин ииппит кыыһын -Яковлева Тамара Семеновна туһунан, кини олорон ааспыт дьоһун олоҕун сырдатар кинигэ. Венера Егоровнаны кытта бииргэ үөрэммит дьүөгэлэрэ Дьячковская Варвара Петровна, Илларионова Альбина Дмитриевна кэлэн ахтыы оҥорон, ыллаан дьоро түгэни киэргэттилэр.