Кулун тутар 2 күнүгэр Саха сирин автономията төрүттэммитэ  100 сылынан улуустааҕы киин библиотека  ааҕар саалатыгар  биллиилээх бэлитиичэскэй, судаарыстыбаннай диэйэтэл  Иван Николаевич Винокуров туһунан «Иван Николаевич Винокуров : сборник архивных документов» диэн кинигэ сурэхтэниитэ  буолан ааста. Тэрээһиҥҥэ  улуус депуттарын  мунньаҕын  Сэбиэтин бэрэссэдээтэлэ Захаров А.А, «Арыылаах  нэһилиэгэ”  МТ дьаһалтатын баһылыга  Лобанов А.Г, кыраайы  үөрэтээччилэр, учууталлар, музей үлэһиттэрэ, библиотекардар   уонна  куйаар ситиминэн холбонон республика араас улуустарыттан элбэх истээччи кыттынна. Ол курдук, Үөһээ-Бүлүү улууһуттан Исидор Барахов аатынан СӨ судаарыстыбаннас мусуойун сэбиэдиссэйэ Светлана Даниловна Копыленко, П.А. Ойуунускай аатынан СӨ судаарыстыбаннас мусуойун  үлэһитэ  Марианна  Егоровна  Барахова, М.К.Аммосов аатынан СӨ судаарыстыбаннаһын историятын мусуойун сэбиэдиссэйэ Александр  Васильевич Кириллин  кыттыыны ыллылар. Кинигэ сүрэхтэниитин Чурапчытааҕы библиотечнай ситим директора Вера Аполлоновна Платонова иилээн-саҕалаан ыытта. Бу сүҥкэн суолталаах  үлэни    Чурапчы улууһун  киин балыыһатын клинико-диагностическай лабораториятын сэбиэдиссэйэ, СӨ доруобуйа  харыстабылын туйгуна Григорьева  Любовь Михайловна уонна СӨ Национальнай архыыбын сурун археограба Александр Александрович Калашников оҥорон таһаардылар.  Кинигэҕэ Иван Николаевич  Винокуров  республика  олохтонуутугар  уонна сайдыытыгар киллэрсибит сүҥкэн кылаатын, үлэлээбит үлэтин туоһулуур архыып  докумуоннара  таҥыллан киирбиттэр. Кэпсэтиигэ кыттыбыт ыалдьыттар сахатын сирин сайыннарыыга үгүс сыратын уурбут ытык киһи, биир дойдулаахпыт И.Н.Винокуров олоҕун уонна үлэтин туһунан киэҥник сырдаттылар. Саха судаарыстыбаннаһын тэрийээччилэртэн биирдэстэрэ, киэн туттар ытык киһибит туһунан дьоҥҥо-сэргэҕэ,  кэнчээри ыччакка сырдатыыга, тиэрдиигэ уонна аатын  үйэтитиигэ  улахан уникальнай научнай   үлэ оҥоһуллубутун  көрсуһуу кыттыылаахтара үрдүктүк сыаналаатылар. Кэпсэтии түмүгүнэн,  саха норуотун биир чулуу бэрэстэбиитэлэ Иван Николаевч Винокуров аата тиллэригэр, үйэтитиллэригэр  улуус, республика  өттүттэн  элбэх үлэ барыахтааҕын тоһоҕолоон бэлиэтээтилэр. Любовь Григорьевнаны  бииргэ үлэлиир коллегалара,  Чурапчы улууһун  киин балыыһатын үлэһиттэрэ  тэрээһиннэ кыттыыны ылан эҕэрдэлээтилэр. Улуус депутаттарын мунньаҕын Сэбиэтин бэрэссэдээтэлэ Афанасий Афанасьевич Захаров  Любовь Михайловна Григорьеваҕа  улуус историятын, бэлиэ дьонун үйэтитиигэ сыралаах үлэтин  сыаналаан уонна эҕэрдэлээн  туран  «Улуус социальнай-экономическай сайдыытыгар киллэрсибит кылаатын иһин»  II истиэпэннээх бочуоттаах бэлиэни туттарда. Убаастабыллаах Любовь Григорьевнаны кинигэҥ сүрэхтэммитинэн итиитик-истиҥник эҕэрдэлиибит уонна айымньылаах, таһаарыылаах үлэни, ситиһиилэри, кытаанах доруобуйаны, дьолу-соргуну баҕарабыт!