Быйыл улууспутугар күүс өттүнэн Хоту Көһөрүллүү 80 сылын бэлиэтиир  декада чэрчитинэн араас дьаһаллар ыытылыннылар. Аҕа дойду Улуу  сэриитин кэмигэр 1942 сыллаахха Чурапчы оройуонун 41 холкуоһа  партия Обкомун бюротун атырдьах ыйын 11 күнүнээҕи 213№-дээх уурааҕынан күүс өттүнэн Кэбээйи, Эдьигээн, Булуҥ  оройуоннарыгар балык булдугар көһөрүллүүгэ  барбыттара. Улуустааҕы киин библиотека  үлэһиттэрэ декада устата оскуола үөрэнээччилэригэр улууспут историятыгар  сүрэхтэн -өйтөн сүппэт,  ыар кэмнэр тустарынан, аҕа көлүөнэ дьон олорон ааспыт олохторун, үлэлээбит үлэлэрин  билиһиннэрэр, сырдатар библиотечнай уруоктары ыыттылар.     Кэриэстэбил күнүгэр   Хоту Көһөрүллүү 80 сылыгар анаммыт общественность мунньаҕар улуустааҕы киин библиотека кинигэ быыстапкатын тэрийдэ. Көһөрүллүүнү  толору сырдатар  өйдөбүнньүк кинигэлэр, ахтыылар, альбомнар  турдулар. Дьаһал кыттыылаахтара, ыалдьыттара биир дойдулаахтарбыт  ыар дьылҕаларын туһунан сүрэхтэригэр чугастык ылынан   история кырдьыгын кэрэһэлиир кинигэлэри көрдулэр, аахтылар.         Киин библиотека үлэһиттэрэ  Р.И.Корякина – Хотууна «Чурапчы алдьархайа…”  хоһоонун аахтылар.   Балаҕан ыйын 20 күнүгэр улуустааҕы гимназияҕа Көһөрүллүү 80 сылыгар анаммыт  «Умнуллубат чахчылар, үйэлээх өйдөбүллэр» республиканскай  форум  ыытылынна. 5 секцияҕа барыта 120 кыттааччы дакылаат аахтылар. «Увековечивание исторической правды» сецияҕа библиотечнай ситим методиһа Егасова Д.П. экспертынан үлэлээтэ. Киин библиотека үлэһиттэрэ  форум кыттыылаахтарыгар көһөрүллүүгэ анаммыт кинигэлэри билиһиннэрэн кэпсээтилэр.    Чурапчытааҕы библиотечнай ситим директора  Платонова Вера Аполлоновна  быйыл саҥа  тахсыбыт «Кэм-кэрдии кээрэппэтин, кэрэ ааккыт кэриэс буоллун»  диэн хоту оройуоннарга көһөрүллүү историятын үйэтитиигэ ыытыллар  үлэлэри сырдатар  альбом -кинигэни  билиһиннэрдэ.     Кинигэни хомуйан оҥордулар М.Ф.Кронникова, М.С.Артемьева, М.Н.Матвеева, М.В.Чичигинарова. С.А Новгородов аатынан «Айар» НКК  бэчээттэнэн таҕыста. Көһөрүллүү историятын дьиҥ кырдьыгынан кэрэһэлиир, кэнчээри ыччакка тиэрдэр, инникитин үөрэтиигэ олук буолар бэчээттэнэн тахсыбыт кинигэлэр  үйэтитиигэ кэмнэммэт улахан суолталаахтар.     Биһиги биир дойдулаахтарбыт, аҕа көлүөнэ дьон  сэрии, көһөрүллүү иэдээнин эттэринэн- хааннарынан билэн, харыларын күүһүнэн дьоллоох олоҕу тутан, үтүө суобастаахтык үлэлээн-хамнаан  төрөөбүт улуустарын, саха сирин сайдыытыгар киллэрбит кылааттарын туһунан билэр, өйдүүр, ытыктыыр биһиги ытык иэспит буолар.