Хадаар нэһилиэгэр сайдыы киинэ аһылынна. 1315 кв.миэтэрэ иэннээх, икки этээстээх баараҕай тутуу бырайыагын бу иннинэ баһылыктыы сылдьыбыт Иван Васильевич Гаврильев саҕалаабыт. Кини 2020 сылга Үрүҥ Күөл сайдыытыгар туһуламмыт култуурунай, эти-хааны сайыннарар бырайыак бөлөҕүн тэрийэн, үлэни ыыппыт. Бырайыак «Тыа сирин кэлимник сайыннарыы» судаарыстыбаннай бырагыраамаҕа киирсэн, 2021 сылтан тутуллан түмүктэннэ. Манна федеральнай, өрөспүүбүлүкэтээҕи, улуустааҕы бүддьүөттэн үп тыырыллыбыт. Итини сэргэ тастан үбүлээһин көрүллүбүт.  Нэһилиэк бибилэтиэкэтэ 2014 сылтан модельнай статуһунан үлэлиир. Үөрүүлээх күҥҥэ СӨ Бырабыыталыстыбатын бэрэссэдээтэлэ Андрей Тарасенко,  СӨ Тыа хаһаайыстыбатын миниистирэ Александр Атласов, Ил Түмэн дьокутааттара Михаил Гуляев, Семен Никитин, Чурапчы улууһун баһылыга Степан Саргыдаев саҥа библиэтиэкэҕэ сырыттыллар, баҕа санааларын эттилэр. Кинилэри сэргэ, улуус салалтатын бэрэстэбиитэллэрэ уо.д.а. кыттыыны ыллылар.  Бу күн бибилэтиэкэ аана сабыллыбакка, кэлбит ыалдьыттары, нэһилиэк олохтоохторун үөрэ-көтө көрүстэ.