Биллиилээх этнограф, кыраайы  үөрэтээччи Андрей Андреевич Саввин – Өндөрүүскэ Саабын  «Гончарное ремесло у якутов»  кинигэтин  сүрэхтэниитэ 

 Чурапчытааҕы  А.А. Саввин аатынан история  уонна этнография мусуойугар  кыраайы үөрэтээччи, чинчийээччи Андрей Андреевич Саввин «Гончарное ремесло у якутов» кинигэтин Чурапчы дьонугар –сэргэтигэр, киэн араҥаҕа билиһиннэрии  дьоро тэрээһинэ буолан ааста. Биллиилээх  этнограф А.А.Саввин 30-40 сылларга  туойу оноруу туһунан  муспут матырыйаалын  түмэн  Тыл уонна литература института, саха сиринээҕи национальнай библиотека, Чурапчы улууһун салалтата  бу кинигэ күн сирин көрөрүгэр үлэлээтилэр.   Сахаларга  туойунан оноруу былыр былыргыттан баарын туоһулуур дириҥ ис хоһоонноох,  сүдү суолталаах  научнай үлэ  200 экземлярынан тахсыбыт. Чурапчытааҕы кииннэммит библиотечнай ситим директора Вера Аполлоновна Платонова кинигэ ис хоһоонун, тутулун, түһүмэхтэрин толору сырдатан билиһиннэрдэ. Кинигэҕэ А.А.Саввин уруһуйдара, бэлиэтээһиннэрэ, туойу оҥоруу ньымалара, араастара, күөс охсуу итэҕэллэрэ, үлэлииргэ туттуллар маллар сиһилии быһаарыылаахтар, информаннар ахтыылара, ааттара — суоллара, терминология  киирбиттэр. Кинигэ уопсай редакциялаан историческай наука доктора Екатерина Назаровна Романова  уонна историческай наука кандидата Наталья Ксенофонтовна Данилова оҥорбуттар. Көрсүһүүгэ кинигэ тахсыытыгар  улахан үлэтин оҥорбут историческай наука доктора Е.Н.Романова Чурапчы дьонун үйэлээх улахан үлэ тахсыбытынан эҕэрдэлээн туран, А. А. Саввин чинчийбит, хомуйбут матырыйааллара  ураты сыаналаах хомуурунньук, саха норуотун духуобунай барҕа баайа, нэһилиэстибэтэ, көмүс фондата буоларын бэлиэтээн эттэ. Кинигэ сүрэхтэниитигэр Чурапчы улууһун баһылыгын  социальнай боппуруоска солбуйааччы Кронникова М.Ф.,  улуус депутаттарын Сэбиэтин мунньаҕын бэрэссэдээтэлэ Захаров А.А., Чурапчы культуратын управлениятын начальнига Гуляев П.П., олоҥхо киинин салайааччыта Попов Д.Д., Таатта улууһуттан Чөркөөхтөөҕү политсыылка түмэлиттэн С.В.Аввакумова, П.А.Ойуунускай аатынан судаарыстыбас түмэлиттэн  О.В. Жерготова, «Таатта»  түмэлиттэн А.Н.Постникова,  Болтоҥо нэһилиэгин баһылыга Ефремов С.Н, Төлөйтөн туой иһити оҥоруунан дьарыктанар бөлөх, Болтоҥоттон биир дойдулаахтара, аймахтара Соловьева И.С., Вырдылина М.Д., Борисова М.Т., учууталлар, библиотека үлэһиттэрэ, норуот маастардара, общественность кытыннылар. Тэрээһиҥҥэ киин библиотека А.А.Саввин олоҕун, үлэтин сырдатар «Үйэлээҕи өтө көрөн» кинигэ быыстапката тэрийдэ. Тэрээһин иккис чааһыгар А.П.Гоголев аатынан  оҕо искусствотын оскуолатын преподавателэ Екечьямов П.А уонна У.В. Матвеева туойтан онорууга олус интириэһинэй  маастар кылааһы ыыттылар. Тэрээһин кыттыылаахтара А.А. Саввин кинигэтэ, саха норуотун төрүт дьарыгын көрдөрөр, үйэлээх бэлэх буоларын, саха түҥ былыргыттан туой иһити оҥорор дьарыга күн бүгүн культурнай, научнай сүдү суолталааҕын уонна кэлэр кэнчээри ыччакка, чинчийээччилэргэ,  утуму салҕааччыларга  көмө-тирэх  буоларын бэлиэтээтилэр. Биир дойдулаахпыт, этнограф,  кыраайы үөрэтээччи Андрей Андреевич Саввин   өссө да элбэх чинчийбит, хомуйбут үлэлэрэ,  архыыпка хараллан сытар  матырыйаала  инникитин  сырдатыллан, бэчээттэнэн  киэҥ араҥаҕа  тахсан  саха норуотун баай историятын, культуратын көрдөрүөхтэрэ, сырдатыахтара  диэн эрэнэбит.