Ыам ыйын 18 күнүгэр улуустааҕы киин библиотека тэрийиитинэн культурнай нэһилиэстибэҕэ анаммыт ааҕыыны көҕүлүүр Бүтүн Арассыыйатааҕы “Библионочь — 2022” аахсыйа «Про традиции» девиһинэн үөрүүлээх аһыллыыта буолла.

  Тэрээһин кыттыылаахтарын кииннэммит библиотечнай ситим директора Вера Аполлоновна Платонова истиҥник эҕэрдэлээтэ.

  Улууска олохсуйбут Арассыыйа бэрэстэбиитэллэрэ Надежда Георгиевна Захарова, Татьяна Викторовна Антипина улуу нуучча норуотун үгэстэрин билиһиннэрдилэр. Омугунан эбэҥки Светлана Степановна Аржакова бэйэтин үгэһин истиҥник кэпсээтэ. Аймахтыы түүр омук — киргиз бэрэстэбиитэлэ Назира Набазбековна Сатыбалдиева Киргизия норуодунай астарын билиһиннэрэн амсатта.

  “Традиции живая нить” кинигэ быыстапкалара, улуус биир биллэр-көстөр асчыта Ульяна Заровняеваттан минньигэс ас атыыта тэрилиннилэр. Норуот үгэстэрин кытары ситимнээх “Оживи картину” умнуллубат уобараһы тыыннаан хаартыскаҕа түстүлэр. Саха норуотун төрүт үгэһэ алгыс туһунан СӨ үөрэҕириитин үтүөлээх үлэһитэ, СӨ Бэрэсидьиэнин Гранын хаһаайына, үрдүк категориялаах этнопедагог Ирина Дмитриевна Пермякова билиһиннэрдэ.

 Нэһилиэнньэ киэҥник сэҥээрэр, сөбүлүүр дьарыга сибэкки үүннэриитэ, онно анаан Ньургуйаана Степанова сүбэлиир маастар-кылааһа ыытылынна, «Куклы мира в народных костюмах» Розалия Степановна Пономарева уонна “Магия камней” Анастасия Ионовна Дьячковская коллекциялара туруоруллан дьон болҕомтотун тарта.

 “Уостан түспэт ырыалар» түһүлгэҕэ сүрэхтэн сүппэт ырыалары астына-дуоһуйа ыллаатылар. Итини тэҥэ “Игротека в библиотеке” анал хоско Аан дойду остуолун оонньууларыгар көхтөөхтүк оонньоотулар, остуол оонньууларын сырдатар кинигэ быыстапкатын сэҥээрдилэр. “Нежданно-негаданно” квест өй оонньуутугар кыттаннар, араас норуоттар олохторун-дьаһахтарын кытары билистилэр, билиилэрин хаҥаттылар.“Поэтическай баттл” поэзия хонуутугар омук бэйиэттэрин хоһооннорун, омук тылын сахалыы саҥарпыт Гаврил Андросов тылбаастарыгар хоһооннору аахтылар.

  Кэрэ куоластаах ырыаһыттар Варя Орлова, Санаайа Баай уонна “Эгэй-сэгэй” этно-фитнес салайааччыта Парасковья Васильевна Гладкина  уонна «Умсулҕан» үҥкүү бөлөҕө таджик норуотун үҥкүүлэринэн бүгүҥҥү киэһээни киэргэттилэр.