Улуустааҕы киин библиотека иһинэн үлэлиир «Эмтээх от-Чурапчы» түмсүү от хомуйар үлэтигэр киирдэ.  Самаан сайын силигилээн, от-мас көҕөрөн турар кэмигэр, тыаҕа тахсан моонньоҕон сэбирдэҕин, дьөлүһүөн сибэккитин, боруу отун, хатын сэбирдэҕин, дьэдьэн сэбирдэҕин хомуйан киирдибит.  Быйылгы дьыл былырыыҥҥытааҕар олус кураан буолан биэрдэ. От-мас тахсаат да хатаччы хатан, саһаран барар эбит. Онон тутатына от-мас тахсан истэҕинэ хомуйан иһиэххэ наада диэн сананныбыт. Эмтээх от хомуйуутун таһынан, түмсүү кыттааччылара библиотекаҕа мустаммыт, кыра кыралаан СВО-ҕа сылдьар   уолаттарбытыгар, биир дойдулаахтарбытыгар аны күһүн сииккэ, тымныйыыга туһаннынар диэн дойдуларыттан хомуллубут эмтээх от холбодуһуктарын, арчыланар-ыраастанар оттору бэлэмниибит.Бу дьылга түмсүү үлэтин уратыта диэн  нэһилиэктэргэ, ол курдук Болтоҥо, Сылан, Кытаанах библиотекаларын филиалларыгар тахсаммыт, эмтээх от хомуйар эйгэтин, туһатын, суолтатын  туһунан билиһиннэрии тэрээһиннэри  ыыттыбыт. Дьон-сэргэ олус хайгыы, интириэһиргии иһиттилэр, мантан сайын эмтээх оту хомуйарга сананнылар.                         Вероника Маркова, түмсүү салайааччыта, улуустааҕы киин библиотека специалиһа